இயற்கை எரிவாயு வலையமைப்பின் விரிவாக்கத்தை விரைவுபடுத்துவதையும், எல்பிஜியை சார்ந்திருப்பதைக் குறைப்பதையும் நோக்கமாகக் கொண்ட ஓர் அரசாணையின்படி, பிஎன்ஜி உள்கட்டமைப்பு மற்றும் விநியோகம் உள்ள பகுதிகளில், பிஎன்ஜியை பயன்படுத்தும் வீடுகள் கட்டாயமாக குழாய்வழி இயற்கை எரிவாயுவிற்கு மாற வேண்டும் என்று மத்திய அரசு கூறியுள்ளது.
மத்திய கிழக்கு நாடுகளில் நடக்கும் போர் காரணமாக இந்தியாவில் எல்பிஜி இறக்குமதிக் கடுமையாகப் பாதிக்கப்பட்டுள்ளது. மேலும், எல்பிஜி விநியோக பற்றாக்குறை ஏற்பட்டுள்ள இந்த சமயத்தில், அதன் அழுத்தத்தைக் குறைக்கும் பொருட்டு, மக்கள் தாங்கள் வசிக்கும் இடங்களுக்கு அருகாமையில் பிஎன்ஜி கிடைத்தால் அதற்கு மாறுமாறு அரசாங்கம் நுகர்வோரிடம் கூறியிருக்கிறது. சிலிண்டர்களுக்கான நெருக்கடி தொடர்வதால், அடிக்கடி சிலிண்டர்களை நிரப்ப வேண்டிய தேவையை நீக்கும் பொருட்டு, குழாய்கள் மூலமான தொடர்ச்சியான விநியோகத்தை முன்னிலைப்படுத்தி, வீடுகள் மற்றும் வணிகப் பயனர்கள் இருவருக்கும் ஒரு மாற்றாக பிஎன்ஜியை அதிகாரிகள் ஊக்குவித்து வருகின்றனர். பெட்ரோலியம் மற்றும் இயற்கை எரிவாயு அமைச்சகத்தால் அறிவிக்கப்பட்ட, 'இயற்கை எரிவாயு மற்றும் பெட்ரோலியப் பொருட்கள் விநியோகம், ஆணை, 2026 மூலம் இந்த உத்தரவை அரசு வெளியிடப்பட்டுள்ளது.
தற்போது வளைகுடாப் பிராந்தியத்தில் உள்ள திரவமாக்கும் ஆலைகள் சேதமடைந்துள்ளன. இதுமட்டுமின்றி, கப்பல்கள் ஹோர்மஸ் நீர்சந்தி வழியாக செல்ல முடிந்தாலும் கூட, எரிவாயுவின் அளவு குறைவாகவே இருக்கும். மேலும், இந்தியாவின் நுகர்வுத் தேவைகளில் 50-60% மட்டுமே பூர்த்திசெய்யும் வரையறுக்கப்பட்ட எல்பிஜி விநியோகத்தால் எழும் அழுத்தங்களைச் சமாளிக்க, பிஎன்ஜி முறைக்கு மாறுவது முக்கியமானது என்று பெட்ரோலியம் மற்றும் இயற்கை எரிவாயு அமைச்சகம் சுட்டிக்காட்டியுள்ளது. இதனால், இறக்குமதி செய்யப்படும் எரிபொருளைச் சார்ந்திருப்பதைக் குறைப்பதற்காக, அரசு அதிக உள்நாட்டுக் குழாய்வழி உள்கட்டமைப்பை அமைக்கப் செய்து வருகிறது.
அரசால் முன்னெடுக்கப்பட்டுள்ள சீர்திருத்தங்களாவன: இந்த உத்தரவின் விதிகளின்படி, பிஎன்ஜி இணைப்பு வசதி உள்ள பகுதிகளில் வசிக்கும் வீடுகள், அந்த இணைப்புக்கு மாற வேண்டும். அங்கீகரிக்கப்பட்ட அமைப்புகளால் அறிவிக்கப்பட்ட வீடுகள், குழாய்கள் பதிக்கப்பட்டுள்ள இடங்களில் பிஎன்ஜி இணைப்புகளுக்கு விண்ணப்பித்து அவற்றைப் பெற வேண்டும் என்று இந்த உத்தரவு குறிப்பிடுகிறது. மேலும், "தகவல் தெரிவிக்கப்பட்ட நாளிலிருந்து மூன்று மாதங்களுக்குப் பிறகு, அந்த வீட்டின் முகவரிக்கு எல்பிஜி விநியோகம் நிறுத்தப்படும்" என்றும் அது குறிப்பிடுகிறது. பொது அதிகார அமைப்புகள், குறிப்பிட்ட காலக்கெடுவிற்குள் அனுமதிகளையோ அல்லது வழித்தட உரிமையையோ வழங்க வேண்டும். அவ்வாறு செய்யத் தவறினால், வழங்கப்பட்ட ஒப்புதல்கள் தானாகவே வழங்கப்பட்டதாகக் கருதப்படும்.
மேலும், இந்த ஆணையின் கீழ் பரிந்துரைக்கப்பட்ட கட்டணங்களுக்கு மேல் வசூலிக்க அதிகாரிகளுக்குத் தடை விதிக்கிறது. குடியிருப்புப் பகுதிகளில், அணுகலை நிர்வகிக்கும் பொறுப்புள்ள அமைப்புகள் மூன்று வேலை நாட்களுக்குள் அனுமதிகளை வழங்க வேண்டும், அதே நேரத்தில் கடைசி மைல் பிஎன்ஜி இணைப்புகள் 48 மணி நேரத்திற்குள் முடிக்கப்பட வேண்டும். அத்தகைய பகுதிகளில் குழாய்வழி இணைப்புக்கான விண்ணப்பங்களை நிராகரிக்கப்படக்கூடாது. மேலும், ஒப்புதல் பெற்ற நான்கு மாதங்களுக்குள் குழாய்களைப் பதிக்கும் பணியைத் தொடங்க வேண்டும். இதைக் கடைப்பிடிக்கத் தவறினால், பிரத்தியேக உரிமைகளை இழக்கும் வாய்ப்பு உட்பட, அபராதங்கள் கூட விதிக்கப்படலாம். இந்த முழுமையான செயலாக்கத்தின் மேற்பார்வையானது பெட்ரோலியம் மற்றும் இயற்கை எரிவாயு ஒழுங்குமுறை வாரியத்திடம் ஒப்படைக்கப்பட்டுள்ளது. இது, சம்பந்தப்பட்ட நிறுவனங்கள் முழுவதும் ஒப்புதல்கள், நிராகரிப்புகள் மற்றும் இணக்கத்தைக் கண்காணிக்கும் என இயக்குநர்களுக்கு புதிய விதிகள் விதிக்கப்பட்டுள்ளது.
அதே நேரத்தில், குழாய் இணைப்பு வழங்குவது 'தொழில்நுட்ப ரீதியாக சாத்தியமற்றது' எனில், தடையில்லாச் சான்றிதழ் (NOC) மூலம் தொடர்ந்து எல்பிஜி விநியோகம் செய்யலாம் மேலும், அந்த வீட்டிற்கான எல்பிஜி விநியோகம் நிறுத்தப்படாது எனவும் இந்த ஆணை கூறுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.