அமெரிக்க அதிபர் டொனால்ட் டிரம்ப் நிர்வாகம், வர்த்தக ரீதியாக இந்தியா உள்ளிட்ட சுமார் 60 நாடுகளுக்குப் பெரும் அதிர்ச்சியைக் கொடுத்துள்ளது. கட்டாய உழைப்பு முறையில் தயாரிக்கப்பட்ட பொருட்களைத் தடுப்பதில் இந்த நாடுகள் தோல்வியடைந்துவிட்டதாகக் குற்றம் சாட்டி, அந்தந்த நாடுகளின் பொருட்கள் மீது புதிய சுங்க வரிகளை விதிக்க அமெரிக்கா திட்டமிட்டுள்ளது. அமெரிக்க வர்த்தக பிரதிநிதி அலுவலகம் (USTR) வெளியிட்டுள்ள அறிக்கையின்படி, இந்த வரி விதிப்பு 10 சதவீதம் முதல் 12.5 சதவீதம் வரை இருக்கும் என்று தெரிகிறது. சட்ட ரீதியான சிக்கல்களைத் தாண்டி, தனது வர்த்தகக் கொள்கைகளைச் செயல்படுத்த டிரம்ப் அரசு எடுக்கும் புதிய முயற்சியாக இது பார்க்கப்படுகிறது.
இந்த புதிய வரி விதிப்புத் திட்டத்தின்படி, கனடா, மெக்சிகோ, தைவான் மற்றும் இங்கிலாந்து போன்ற நாடுகளின் பொருட்கள் மீது 10 சதவீத வரியும், இந்தியா, சீனா, ஜப்பான், தென் கொரியா, பிரேசில் மற்றும் சுவிட்சர்லாந்து போன்ற நாடுகளின் பொருட்கள் மீது 12.5 சதவீத கூடுதல் வரியும் விதிக்கப்பட வாய்ப்புள்ளது. இந்த அறிவிப்பு உடனடியாக அமலுக்கு வராது என்றாலும், இது தொடர்பாகப் பொதுமக்களின் கருத்துக்கள் கேட்கப்படும். ஒருவேளை இந்தத் திட்டம் அமல்படுத்தப்பட்டால், அமெரிக்க உச்ச நீதிமன்றம் விதித்த தடைகளை மீறி, டிரம்ப் தனது வரி விதிப்புக் கொள்கைகளைத் தடையின்றி செயல்படுத்த முடியும்.
கடந்த சில மாதங்களாகவே, 1974-ஆம் ஆண்டின் வர்த்தகச் சட்டத்தின் கீழ், பல நாடுகளின் வர்த்தக முறைகள் குறித்து அமெரிக்கா விசாரணை நடத்தி வந்தது. குறிப்பாக, கட்டாய உழைப்பு மூலம் தயாரிக்கப்பட்ட பொருட்கள் இறக்குமதியைத் தடுப்பதில் இந்த நாடுகள் ஏன் நடவடிக்கை எடுக்கவில்லை என்பதும், அது எப்படி அமெரிக்க வர்த்தகத்தைப் பாதிக்கிறது என்பதும் இந்த விசாரணையின் நோக்கம். சுமார் 54 நாடுகள், கட்டாய உழைப்பு இறக்குமதித் தடையைச் சரியாகச் செயல்படுத்தவில்லை என்று அமெரிக்கா கடுமையாகச் சாடியுள்ளது. இந்தியா, சீனா, வங்கதேசம், ரஷ்யா மற்றும் ஐக்கிய அரபு அமீரகம் எனப் பல நாடுகள் இந்தப் பட்டியலில் உள்ளன.
இந்த நடவடிக்கை குறித்து அமெரிக்க வர்த்தக பிரதிநிதி ஜேமிசன் கிரீர் கூறுகையில், முக்கியமான வர்த்தக நாடுகள் கட்டாய உழைப்பால் தயாரிக்கப்பட்ட பொருட்களைத் தடுக்கத் தவறுவது ஏற்றுக்கொள்ள முடியாதது என்று கூறியுள்ளார். இது அமெரிக்கத் தொழிலாளர்களைப் பாதிப்பதாகவும், உலக அளவில் சமமான வர்த்தக சூழலை உருவாக்குவதற்குத் தடையாக இருப்பதாகவும் அவர் குறிப்பிட்டுள்ளார். இருப்பினும், மாட்டிறைச்சி, காபி, சில பழங்கள் மற்றும் பருப்பு வகைகள் போன்ற பொருட்களுக்கு இந்த வரியில் இருந்து விலக்கு அளிக்கப்பட்டுள்ளது. வரும் ஜூலை 6-ஆம் தேதிக்குள் இது குறித்து பொதுமக்கள் தங்கள் கருத்துக்களைத் தெரிவிக்கலாம் என்று அமெரிக்கா அழைப்பு விடுத்துள்ளது.
இதற்கிடையே, ஒரு முக்கியமான வர்த்தகப் பேச்சுவார்த்தைக்காக அமெரிக்கத் தூதுக்குழு ஒன்று டெல்லியில் முகாமிட்டுள்ளது. தலைமைப் பேச்சுவார்த்தையாளர் பிரெண்டன் லிஞ்ச் தலைமையிலான இந்த குழு, இந்தியாவுடன் வர்த்தக உடன்படிக்கைகளை இறுதி செய்ய பேச்சுவார்த்தை நடத்தி வருகிறது. இந்திய வர்த்தகத் துறையின் கூடுதல் செயலாளர் தர்பன் ஜெயின் தலைமையிலான இந்தியக் குழுவினருடன் இந்த பேச்சுவார்த்தைகள் நடைபெறுகின்றன. சந்தை அணுகல், சுங்கவரி மற்றும் பொருளாதாரப் பாதுகாப்பு ஒத்துழைப்பு போன்றவை முக்கிய விவாதப் பொருட்களாக உள்ளன. பிப்ரவரி மாதம் எடுக்கப்பட்ட முடிவின்படி, இந்தியப் பொருட்கள் மீதான வரியை 18 சதவீதமாகக் குறைக்க அமெரிக்கா ஒப்புக்கொண்டது. அதேபோல், ரஷ்யாவிடமிருந்து இந்தியா கச்சா எண்ணெய் வாங்குவது தொடர்பான தடைகளையும் நீக்குவதாக இருந்தது. தற்போது இந்த புதிய வரி விவகாரம், வர்த்தகப் பேச்சுவார்த்தைகளில் என்ன மாதிரியான தாக்கத்தை ஏற்படுத்தும் என்பதுதான் பெரும் எதிர்பார்ப்பாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்