முன்னாள் குடியரசுக் கட்சி அதிபர் ஜார்ஜ் டபிள்யூ. புஷ்-இன் தேசிய பாதுகாப்பு கவுன்சிலில் (National Security Council) பணியாற்றிய ஆஷ்லே ஜே. டெல்லிஸ், இரகசிய ஆவணங்களை சட்டவிரோதமாக வைத்திருந்ததாகவும், சீன அதிகாரிகளைச் சந்தித்ததாகவும் குற்றம் சாட்டப்பட்டு கைது செய்யப்பட்டுள்ளார்.
ஆஷ்லே டெல்லிஸ் மீதான குற்றச்சாட்டுகள்:
கடந்த செப்டம்பர் மற்றும் அக்டோபர் மாதங்களில், டெல்லிஸ் பாதுகாப்புத் துறை (Defence Department) மற்றும் வெளியுறவுத் துறை கட்டிடங்களுக்குள் நுழைந்ததையும், இராணுவ விமானங்களின் திறன்கள் உட்பட வகைப்படுத்தப்பட்ட ஆவணங்களை அணுகி அச்சிட்டதையும், பின்னர் காரில் வெளியேறியதையும் கண்டதாக எஃப்.பி.ஐ. பிரமாணப் பத்திரம் கூறுகிறது.
செப்டம்பர் 25 அன்று மாலை அலெக்ஸாண்டிரியா, வர்ஜீனியாவில் உள்ள பென்டகனின் நெட் அசெஸ்மென்ட் அலுவலகத்தில் (ONA - Office of Net Assessment) உள்ள ரகசிய ஆவணங்கள் வசதிக்குள் (SCIF - Sensitive Compartmented Information Facility) டெல்லிஸ் நுழைந்ததை அடுத்து, கண்காணிப்பு நடவடிக்கை தொடங்கியது.
ரகசிய ஆவணங்கள்
வீடியோ காட்சிகளில் டெல்லிஸ், 'அதி ரகசியம் (TOP SECRET)' என்று குறிக்கப்பட்ட பல ஆவணங்களை நோட்பேட்களுக்குள் மறைத்து வைத்தது பதிவாகியுள்ளது. இந்த ஆவணங்களை அவர் தனது தோல் ப்ரீஃப்கேஸில் வைத்துக்கொண்டு வளாகத்தை விட்டு வெளியேறினார் என்று கூறப்படுகிறது. செப்டம்பர் 25, அன்று, டெல்லிஸ் வெளியுறவுத் துறையின் 'கிளாஸ்நெட்' அமைப்பை (ரகசிய தகவல்தொடர்புகளுக்கானது) அணுகியதாகவும், 1,288 பக்கங்களைக் கொண்ட அமெரிக்க விமானப்படை ஆவணத்தை 'Econ Reform' என்று தவறாகப் பெயரிட்டு சேமித்து, அதன் பகுதிகளைப் பல பிரிவுகளாக அச்சிட்டதாகவும் கூறப்பட்டுள்ளது.
வீட்டில் ஆவணங்கள் கண்டுபிடிப்பு:
அடுத்தடுத்த வாரங்களில் அவரின் நடமாட்டத்தைக் கண்காணித்தபின், அக்டோபர் 10, 2025 அன்று டெல்லிஸ் மீண்டும் ONA SCIF-க்குள் அதே ப்ரீஃப்கேஸில் வைத்தபோது அவர் பிடிபட்டார். மறுநாள், அக்டோபர் 11, 2025 அன்று, வர்ஜீனியாவின் வியன்னாவில் உள்ள அவரது வீட்டில் நீதிமன்ற உத்தரவுடன் எஃப்.பி.ஐ. சோதனை நடத்தியது. அங்கு, பூட்டப்பட்ட அலமாரிகள், அவரது மேசை, மற்றும் அடித்தள சேமிப்பு அறையில் உள்ள "மூன்று பெரிய கருப்பு குப்பை பைகள்" ஆகியவற்றிலிருந்து, 'TOP SECRET' மற்றும்/அல்லது 'SECRET' என்று குறிக்கப்பட்ட ஆயிரத்துக்கும் மேற்பட்ட பக்கங்கள் கொண்ட ஆவணங்களைக் கண்டுபிடித்தனர்.
சீன அதிகாரிகளைச் சந்தித்தது:
டெல்லிஸ், வாஷிங்டன் புறநகரில் உள்ள ஃபேர்ஃபாக்ஸ், வர்ஜீனியாவில் உள்ள ஒரு உணவகத்தில், பல ஆண்டுகளாக சீன மக்கள் குடியரசின் (PRC) அரசு அதிகாரிகளைப் பலமுறை சந்தித்ததாக கூறப்படுகிறது. செப்டம்பர் 15 அன்று நடந்த ஒரு இரவு விருந்தில் டெல்லிஸ் ஒரு கவருடன் வந்ததாகவும், ஆனால் வெளியேறும்போது அது அவரிடம் இல்லை என்றும், இரண்டு சந்தர்ப்பங்களில் சீன அதிகாரிகள் அவருக்குப் பரிசுக் பைகளைக் கொடுத்ததாகவும் குறிப்பிடப்பட்டுள்ளது.
விசாரணை மற்றும் தண்டனை:
வெளியுறவுத் துறை மற்றும் பென்டகனில் பணிபுரிந்ததன் காரணமாக டெல்லிஸ் 'அதி ரகசிய பாதுகாப்பு அனுமதி' (Top Secret security clearance) வைத்திருந்தார் என்று வழக்கறிஞர்கள் தெரிவித்தனர். சனிக்கிழமை (அக்டோபர் 11, 2025) அவரது வீட்டில் சோதனை நடத்தப்பட்டு, அதே நாளில் ரோம் நகருக்குப் தப்பிக்கவிருந்த அவர் கைது செய்யப்பட்டார். சட்டவிரோதமாக ஆவணங்களை வைத்திருந்த குற்றச்சாட்டுகளில் அவர் தண்டிக்கப்பட்டால், டெல்லிஸுக்கு 10 ஆண்டுகள் வரை சிறைத் தண்டனையும், 250,000 டாலர் அபராதமும் விதிக்கப்படும் என்று நீதித்துறை தெரிவித்துள்ளது.
ஆஷ்லே டெல்லிஸ் யார்?
இந்தியாவில் பிறந்த, பின்னர் அமெரிக்கக் குடியுரிமை பெற்ற டெல்லிஸ், கார்னகி எண்டோவ்மென்ட் ஃபார் இன்டர்நேஷனல் பீஸ் (Carnegie Endowment for International Peace) நிறுவனத்தில் ஒரு மூத்த உறுப்பினராக உள்ளார். முன்னாள் அதிபர் ஜார்ஜ் டபிள்யூ. புஷ் நிர்வாகத்தில் அவர் உயர் பதவிகளில் இருந்துள்ளார். உலகிலேயே மிகப்பெரிய இரண்டு ஜனநாயக நாடுகளுக்கு இடையிலான உறவுகளை வலுப்படுத்தும் மைல்கல்லாகக் கருதப்பட்ட இந்தியாவுடனான சிவில் அணுசக்தி ஒப்பந்தத்தை (civil nuclear deal) பேச்சுவார்த்தை நடத்த அவர் உதவினார். இருப்பினும், சமீபத்திய ஆண்டுகளில், ரஷ்யா மற்றும் ஈரானுடனான இந்தியாவின் உறவுகளைச் சுட்டிக்காட்டி, அமெரிக்காவின் இந்திய நட்புறவுக் கொள்கைகளுக்கு எதிராக வாஷிங்டனில் வெளிப்படையாகக் கருத்துத் தெரிவிக்கும் நிபுணர்களில் ஒருவராக அவர் அறியப்பட்டார். சீனாவுக்கு இணையாக இந்தியா விரைவில் எழுச்சி பெற வாய்ப்பில்லை என்றும் அவர் சமீபத்தில் ஒரு கட்டுரையில் சந்தேகம் எழுப்பியிருந்தார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.