ரிங்கு சிங்கிடம் டிசைன் டிசைனாக பணம் கேட்டு மிரட்டிய மர்ம நபர் - எதற்கும் அசைந்து கொடுக்காமல் டீல் செய்த ரிங்கு!

சமீபத்தில் பரபரப்பாக நடந்த ஆசியக் கோப்பை இறுதிப் போட்டியில், அழுத்தமான சூழலில் இந்தியாவுக்கு வெற்றியைத் தேடித் தந்த ரிங்கு சிங்கிடம் மர்ம நபர் ஒருவர் ரூ. 5 கோடி பணம் கேட்டு மிரட்டியுள்ளார்.

இந்த மிரட்டல் சம்பவம் ஒரே இரவில் நடக்கவில்லை. 2025 ஆம் ஆண்டு பிப்ரவரி மாதத்தில் இருந்து, நவீத் (Naveed) என்ற பெயருடைய ஒரு தனிநபர், ரிங்கு சிங்குக்குத் தொடர்ச்சியாக மெசேஜ்களை அனுப்பியுள்ளார். இந்த உரையாடல், முதலில் ஒரு சாதாரண ரசிகனின் பணிவான கோரிக்கையாகத் தொடங்கி, படிப்படியாக ஒரு கடுமையான மிரட்டலாக உருமாறியுள்ளது.

ரசிகர் என்ற போர்வையில் முதல் கோரிக்கை (ஏப்ரல் 5, 2025) மிரட்டல் விடுத்த நவீத், தான் ரிங்கு சிங்கின் மிகப் பெரிய ரசிகன் என்று முதலில் அறிமுகப்படுத்திக் கொண்டார்.

"நீங்கள் நலமாக இருக்கிறீர்கள் என்று நம்புகிறேன். நீங்கள் கொல்கத்தா நைட் ரைடர்ஸ் (KKR) அணிக்காக விளையாடுவது எனக்கு மகிழ்ச்சி அளிக்கிறது. நீங்கள் தொடர்ந்து முயற்சி செய்து விரைவில் கிரிக்கெட்டின் உச்சத்தை அடைவீர்கள். என்னால் முடிந்தால், எனக்குப் பொருளாதார ரீதியில் நீங்கள் உதவ வேண்டும் என்று பணிவுடன் கேட்டுக் கொள்கிறேன். நீங்கள் உதவினால், அல்லாஹ் உங்களை இன்னும் ஆசீர்வதிப்பார்."

இந்த மெசேஜ், வெளிப்படையாகப் பணம் கேட்டாலும், ஒரு ரசிகர் தனது விருப்பத்தை வெளியிடுவது போலவும், நிதியுதவி கோருவது போலவுமே இருந்தது.

நேரடி மிரட்டல் (ஏப்ரல் 9, 2025)

முதல் செய்தியில் ரிங்கு சிங்கிடம் இருந்து எந்தப் பதிலும் வராத நிலையில், சில நாட்கள் கழித்து, நவீத் அனுப்பிய இரண்டாவது மெசேஜில் அவருடைய தொனி முற்றிலும் மாறிவிட்டது. இங்கு கோரிக்கை நேரடியாக உத்தரவாக மாறியது.

"எனக்கு 5 கோடி ரூபாய் வேண்டும். எப்போது, எங்குச் சந்திக்க வேண்டும் என்பதை நான் ஏற்பாடு செய்வேன். தயவுசெய்து உங்கள் உறுதிப்படுத்தலை (Confirmation) உடனடியாக அனுப்புங்கள்."

இறுதி அச்சுறுத்தல்: மாஃபியா குழுவின் பெயர் பயன்பாடு (ஏப்ரல் 20, 2025)

இந்த நேரடி மிரட்டலுக்கும் ரிங்கு சிங் பதில் அளிக்காததால், நவீத் ஒரு மிகத் தீவிரமான இறுதி எச்சரிக்கையை அனுப்பினார். இந்தச் செய்தியில்தான் மிரட்டிப் பணம் பறிக்கும் முயற்சி வெளிப்படையாகத் தெரிய வந்தது.

"நினைவூட்டல்! டி-கம்பெனி (D-Company)"

நவீத், இந்தச் செய்தியில் ஒரு சர்வதேச குற்றவியல் அமைப்பின் (Organised Crime) பெயரைக் குறிப்பிட்டு, ரிங்கு சிங்கை அச்சுறுத்தவும், பயமுறுத்தவும் முயன்றுள்ளார்.

இந்த மிரட்டல் செய்திகளுக்கு ரிங்கு சிங் எந்த பதிலும் அளிக்கவில்லை என்று செய்திகள் தெரிவிக்கின்றன. மேலும், அவர் இந்தச் சம்பவம் குறித்து காவல்துறையில் அதிகாரப்பூர்வமாகப் புகார் அளித்துள்ளாரா அல்லது இந்திய கிரிக்கெட் வாரியத்திடம் (BCCI) தகவல் தெரிவித்துள்ளாரா என்பது குறித்த விவரங்கள் எதுவும் வெளியாகவில்லை. எனினும், ஒரு கிரிக்கெட் வீரருக்கு இந்த அளவுக்கு அச்சுறுத்தல் வந்திருப்பது கிரிக்கெட் வட்டாரங்களில் கவலையை ஏற்படுத்தியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.