.png)
திண்டுக்கல் மாவட்டம் அய்யன் கோட்டை புதூர் கிராமத்தை சேர்ந்தவர் 25 வயதான தவபாண்டி. இவர் அய்யன்கோட்டை பகுதியை சேர்ந்த பெண்களை கேலி செய்து பேசியுள்ளார் இதை பார்த்த அப்பகுதியை சேர்ந்த 25 வயதான கொடி என்ற இளைஞர் அவர்களது நண்பர்களுடன் சேர்ந்து கொண்டு தவபாண்டியை அடித்து கண்டித்துள்ளார். இதனால் ஆத்திரம் அடைந்த தவபாண்டி தனது நண்பர்களுடன் சேர்ந்து கொடியை தாக்கி காயம் ஏற்படுத்தியுள்ளார்.
பின்னர் கொடியும் அவரது நண்பர்களும் தவபாண்டி தரப்பினரை தாக்கியுள்ளனர். இது போல மாறி மாறி இருதரப்பினரும் அடித்து கொண்ட நிலையில் நேற்று காலை கொடி அரிவாளுடன் தவபாண்டி வீட்டிற்கு சென்று அவரை மிரட்டியுள்ளார். இதனால் ஆத்திரமடைந்த தவபாண்டி கொடியை கொலை செய்ய முடிவு செய்து தனது நண்பர்களையும் கூட்டு சேர்த்துள்ளார். அதன்படி நேற்று இரவு தவபாண்டி, அவரது சகோதரர் நாக பாண்டி மற்றும் அவரது நண்பர் சஞ்சய் ஆகிய மூவரும் கொடி வீட்டிற்கு சென்றுள்ளனர்.
அங்கு உறங்கிக்கொண்டிருந்த கொடியை மூவரும் சேர்ந்து எழுப்பி வெளியில் கூட்டி வந்த நிலையில் தவபாண்டி கொடியை கையில் வைத்திருந்த அரிவாளால் சரமாரியாக வெட்டி கொலை செய்துள்ளார். கொடியின் அலறல் சத்தம் கேட்டு வெளியில் வந்த அக்கம் பக்கத்தினர் கொடி உயிரிழந்து கிடந்தது பார்த்து அதிர்ச்சியடைந்துள்ளனர். தகவல் அறிந்து சம்பவ இடத்திற்கு வந்த போலீசார் கொடியின் உடலை கைப்பற்றி பிரேத பரிசோதனைக்கு அனுப்பி வைத்துள்ளனர்.
இந்நிலையில் வழக்கு பதிவு செய்து தப்பி சென்ற மூவரையும் தேடிவந்த போலீசார் தவ பாண்டியை கைது செய்து அவர் அளித்த வாக்குமூலத்தின் படி நாகப்பாண்டி மற்றும் சஞ்சயை கைது செய்து விசாரணை நடத்தினர். கொலை செய்த தவ பாண்டி மற்றும் அதற்கு உடந்தையாக இருந்த நாக பாண்டி, சஞ்சயை நீதிமன்றத்தில் ஆஜர்படுத்தி சிறையில் அடைத்துள்ளனர். பெண்களை கேலி செய்தவர்களை தட்டிக் கேட்டதற்கு ஒருவர் கொல்லப்பட்டது அப்பகுதி மக்களிடையே பெரும் பரபரப்பை ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
