வரதட்சணை கொடுமை: மகனின் கண்முன்னே தாய்க்கு நேர்ந்த கொடூரம்!

உத்தரப் பிரதேசத்தின் கிரேட்டர் நொய்டாவில் (Greater Noida) வரதட்சணைக் கொடுமை காரணமாக ஒரு பெண் கொடூரமான முறையில் கொல்லப்பட்ட சம்பவம், நாடு முழுவதும் பெரும் அதிர்ச்சியையும், சோகத்தையும் ஏற்படுத்தியுள்ளது. தனது கணவர் மற்றும் மாமியார், தாயை எரித்ததைக் கண்ட ஆறு வயதுச் சிறுவன் அளித்த வாக்குமூலம், இந்த வழக்கில் முக்கியமான திருப்பமாக அமைந்துள்ளது.

சம்பவத்தின் பின்னணி:

நிக்கி என்ற 26 வயதுப் பெண், 2016-ல் விபின் என்பவரைத் திருமணம் செய்து கொண்டு, சிரசா கிராமத்தில் வசித்து வந்தார். இவர்களுக்கு ஒரு ஆறு வயது மகன் உள்ளான். நிக்கியின் அக்கா காஞ்சன், விபினின் சகோதரர் ரோஹித் என்பவரைத் திருமணம் செய்து, அதே வீட்டில் வசித்து வந்தார். திருமணத்தின்போது, நிக்கியின் குடும்பத்தினர் ஒரு ஸ்கார்பியோ கார் மற்றும் பிற விலைமதிப்புள்ள பொருட்களை வரதட்சணையாகக் கொடுத்ததாகக் கூறப்படுகிறது. ஆனால், விபினின் குடும்பத்தினர் அதோடு நிற்காமல், மேலும் ரூ.36 லட்சம் வரதட்சணை கேட்டு நிக்கியைத் தொடர்ந்து துன்புறுத்தி வந்துள்ளனர்.

மகனின் கண்முன்னே நடந்த கோரம்

ஆகஸ்ட் 21, வியாழக்கிழமை இரவு, நிக்கிக்கும் அவரது கணவர் விபின் மற்றும் மாமியாருக்கும் இடையே வாக்குவாதம் ஏற்பட்டுள்ளது. இது சண்டையாக மாறியுள்ளது. அப்போது, விபினும் அவரது குடும்பத்தினரும் நிக்கியை கொடூரமாகத் தாக்கியுள்ளனர். அதை நேரில் பார்த்த நிக்கியின் ஆறு வயது மகன், தனது தாயின் நிலை குறித்து அண்டை வீட்டாரிடம் கூறியபோது, "என் அம்மா மீது எதையோ ஊற்றினார்கள், பிறகு கன்னத்தில் அறைந்து, லைட்டரால் தீ வைத்தார்கள்" என்று மிரண்டு போய்க் கூறியுள்ளார்.

இந்தச் சம்பவம் தொடர்பான இரண்டு வீடியோக்கள் இணையத்தில் வெளியாகி, காண்பவர்களைக் கலங்கடித்தன. ஒரு வீடியோவில், விபினும் அவரது மாமியாரும் நிக்கியின் தலையைத் தரையில் வைத்து இழுப்பதும், இன்னொரு வீடியோவில், தீக்காயங்களுடன் நிக்கி படிக்கட்டுகளில் மெதுவாக நடந்து செல்வதும் பதிவாகியுள்ளது. இந்த வீடியோக்களை, அதே வீட்டில் வசிக்கும் அவரது அக்கா காஞ்சன் தனது மொபைலில் பதிவு செய்துள்ளார்.

அக்கா காஞ்சனின் வாக்குமூலம்:

"பல நாட்களாக வரதட்சணை கொடுமைக்காக நாங்கள் இருவரும் துன்புறுத்தப்பட்டு வந்தோம். அவர்கள் ரூ.36 லட்சம் வரதட்சணை கேட்டார்கள். என் தங்கை நிக்கியைத் தீ வைத்துக் கொளுத்துவதற்கு முன்பு, அவரது கழுத்து மற்றும் தலையில் கடுமையாகத் தாக்கினர். அப்போது என் குழந்தைகளும் அங்கிருந்தனர். நானும் தாக்கப்பட்டு மயக்கமடைந்தேன்," என்று காஞ்சன் வேதனையுடன் தெரிவித்தார். விபின் மற்றொரு திருமணம் செய்துகொள்வதற்காகவே நிக்கியை திட்டமிட்டுக் கொன்றதாகவும் அவர் குற்றம்சாட்டினார்.

காவல்துறை நடவடிக்கை:

தீக்காயங்களுடன் மீட்கப்பட்ட நிக்கி, முதலில் ஃபார்டிஸ் மருத்துவமனையில் அனுமதிக்கப்பட்டு, பின்னர் டெல்லியில் உள்ள சஃப்தர்ஜங் மருத்துவமனைக்குக் கொண்டு செல்லப்பட்டார். ஆனால், மருத்துவமனை செல்லும் வழியிலேயே அவர் உயிரிழந்தார்.

நிக்கியின் அக்கா காஞ்சன் அளித்த புகாரின் பேரில், விபின், அவரது சகோதரர் ரோஹித், மற்றும் அவர்களது பெற்றோர்கள் மீது கொலை, சதி, மற்றும் துன்புறுத்தல் உள்ளிட்ட பிரிவுகளின் கீழ் கஸ்னா காவல் நிலையத்தில் வழக்குப் பதிவு செய்யப்பட்டது. இதுவரை, விபின் கைது செய்யப்பட்டுள்ளார். மற்றவர்கள் தலைமறைவாக உள்ளனர், அவர்களைத் தேடும் பணி தீவிரமாக நடந்து வருகிறது என்று காவல் துறையினர் தெரிவித்துள்ளனர்.

நிக்கியின் மகன், இப்போது அவரது அக்கா காஞ்சனுடன் வசித்து வருகிறான். அவனைத் தன் குழந்தையாகவே வளர்க்கப்போவதாக காஞ்சன் கூறியுள்ளார். இந்தச் சம்பவம், வரதட்சணைக் கொடுமையின் கோரமான முகத்தை மீண்டும் ஒருமுறை வெளிப்படுத்தியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.