.png)
பஞ்சாபின் ஜலந்தரில் பெண் மருத்துவர் ஒருவர் உயிரிழந்ததை அடுத்து, அவரது கணவர் மீது குடும்ப வன்முறை , நிதி மோசடி மற்றும் திருமணத்திற்குப் புறம்பான உறவு போன்ற குற்றச்சாட்டுகள் எழுந்துள்ளன. இதனைத் தொடர்ந்து, கணவரை உடனடியாகக் கைது செய்ய வேண்டும் என்றும், அவரது மரணச் சூழ்நிலைகள் குறித்து விரிவான விசாரணை நடத்த வேண்டும் என்றும் அவரது குடும்பத்தினர் கோரிக்கை விடுத்துள்ளனர்.
கபூர்தலாவில் அரசு மருத்துவராகப் பணியாற்றி வந்த டாக்டர் மீனாட்சி சூட், புதன்கிழமை காலை ஜலந்தரில் உள்ள தனது இல்லத்தில் சடலமாகக் கண்டெடுக்கப்பட்டார். அவரது தந்தை அளித்த வாக்குமூலத்தின் அடிப்படையில், பாரதிய நியாய சம்ஹிதாவின் (பிஎன்எஸ்) 106வது பிரிவின் கீழ் காவல்துறையினர் வழக்குப் பதிவு செய்து விசாரணையைத் தொடங்கியுள்ளனர்.
ஜலந்தரில் உள்ள நேஷனல் ஐ கேர் மருத்துவமனையை நடத்தி வரும் அவரது கணவரான டாக்டர் பியூஷ் சூட், பல ஆண்டுகளாக அவரை மனரீதியாகவும் உடல்ரீதியாகவும் துன்புறுத்தியதாக இறந்த பெண்ணின் குடும்பத்தினர் குற்றம் சாட்டியுள்ளனர். மேலும், அவர் அப்பெண்ணின் பெயரில் கோடிக்கணக்கான ரூபாய் கடன்களை ரகசியமாகப் பெற்றதாகவும், மேலும், தனது மருத்துவமனையில் பணிபுரியும் ஒரு பெண்ணுடன் திருமணத்திற்குப் புறம்பான உறவில் ஈடுபட்டிருந்ததாகவும் அவர்கள் குற்றம் சாட்டியுள்ளனர்.
மீனாட்சியின் தந்தை பிரமோத் குமார் கூற்றுப்படி, அந்தத் தம்பதியினர் 2018 ஆண்டு அக்டோபரில் திருமணம் செய்துகொண்டுள்ளனர். இதனையடுத்து, தார் எஸ்யூவி கார் ஒன்றை வாங்குவதற்காகத் தனது மகளின் பெயரில் கடன் வாங்கப்பட்டதாகவும், அதற்கான தவணைகளை அவர் தனது சம்பளத்திலிருந்து தொடர்ந்து செலுத்தி வந்ததாகவும் அவர் கூறினார்.
மேலும், வாகனம் மற்றும் மருத்துவமனை தொடர்பான தேவைகளுக்காக டாக்டர் பியூஷ், மீனாட்சியின் பெயரில் சுமார் 45 லட்சம் ரூபாய் கடன் வாங்கியிருந்ததாக அவரது குடும்பத்தினர் மேலும் குற்றம் சாட்டியுள்ளனர். சமீபத்தில், மீனாட்சியின் பெயரில் கிட்டத்தட்ட 2.5 கோடி ரூபாய் மதிப்பிலான மற்றொரு கடன் செயல்பாட்டில் இருப்பதை அவர் கண்டுபிடித்தபோது, நிலைமை மேலும் மோசமடைந்ததாக அவர்கள் கூறினர்."அவள் ஒரு வீடு வாங்கத் திட்டமிட்டு வங்கிக்குச் சென்றபோது, அவள் பெயரில் சுமார் 2.5 கோடி ரூபாய் கடன் இருப்பதை அறிந்தாள். அந்த ஆவணங்களில் அவளுடைய கையொப்பம் கூட இல்லை," என்று மீனாட்சியின் தந்தை குற்றம் சாட்டினார். இந்த வெளிப்பாடு மீனாட்சிக்கு மிகுந்த மன உளைச்சலை ஏற்படுத்தியதாகவும் அவர் கூறினார்.
குடும்பத்தினர் கூற்றுப்படி, திருமண தகராறுகள் காரணமாக மீனாட்சி 2025 ஜூலை முதல் தனது கணவரிடமிருந்து பிரிந்து வாழ்ந்து வந்துள்ளார். மேலும் விவாகரத்து கோருவது குறித்தும் பரிசீலித்து வந்துள்ளார். மேலும், திருமணமான காலத்தில் டாக்டர் பியூஷ் தனது மகளைத் தொடர்ந்து தாக்கியதாகவும் அவரது பெற்றோர் குற்றம் சாட்டினர். வாக்குவாதங்களுக்குப் பிறகு தனது மருமகன் அடிக்கடி தொலைபேசியில் அழைத்து, மீனாட்சியை அடித்ததை ஒப்புக்கொண்டு பின்னர் மன்னிப்பு கேட்பார் என்று பாதிக்கப்பட்ட பெண்ணின் தாய் குற்றம் சாட்டினார். முன்னதாக தனது மகளின் கழுத்தை நெரித்துக் கொல்ல ஒரு முயற்சி நடந்ததாகவும் தந்தை திடுக்கிடும் தகவலை கூறியுள்ளார்.
மேலும், டாக்டர் பியூஷ் தனது மருத்துவமனையில் பணிபுரியும் ஒரு பெண்ணுடன் உறவில் இருந்ததாகவும் அவரது குடும்பத்தினர் குற்றம் சாட்டியுள்ளனர். மீனாட்சிக்கு சந்தேகம் ஏற்பட்டதாகவும், அவர் மருத்துவமனையின் சிசிடிவி காட்சிகளை ஆய்வு செய்தபோது, இருவரும் ஒன்றாக இருந்தது தெரியவந்ததாகவும் அவர்கள் தெரிவித்துள்ளனர். விசாரணையின் ஒரு பகுதியாக அந்தக் காட்சிகள் காவல்துறையிடம் ஒப்படைக்கப்பட்டுள்ளதாக குடும்பத்தினர் தெரிவித்துள்ளனர்.
இதற்கிடையில், டாக்டர் பியூஷ் ஒரு பெண்ணுடன் இருப்பது போன்றதாகக் கூறப்படும் சிசிடிவி காட்சி ஒன்று சமூக வலைதளங்களில் வெளியாகியுள்ளது. அந்த வீடியோவின் உண்மைத்தன்மை சரிபார்க்கப்படவில்லை என்றும் மேலும் இது குறித்து காவல்துறை எந்தக் கருத்தும் தெரிவிக்கவில்லை. புதன்கிழமை காலை கட்டுப்பாட்டு அறை மூலம் இந்தச் சம்பவம் குறித்த தகவல் கிடைத்ததாக ஜலந்தர் காவல்துறை தெரிவித்துள்ளது. கேவல் விஹாரில் உள்ள வீட்டிற்குச் சென்ற அதிகாரிகள், கதவுகள் உள்ளிருந்து பூட்டப்பட்டிருப்பதைக் கண்டனர். உள்ளூர்வாசிகள் முன்னிலையில் கண்ணாடிப் பலகையை உடைத்து வீட்டிற்குள் நுழைந்ததாகவும், அதைத் தொடர்ந்து மீனாட்சியின் உடல் தரையில் கிடந்ததாகவும் காவல்துறை தரப்பில் கூறப்பட்டுள்ளது.
மேலும், விசாரித்த காவல்துறையினர் குற்றம் சாட்டப்பட்ட கணவரின் கைபேசி அணைக்கப்பட்டிருந்ததாகவும், அவரிடம் இன்னும் விசாரணை நடத்தப்படவில்லை என்று கூறப்படுகிறது.பிரேதப் பரிசோதனை முடிவுகளுக்காக மீனாட்சியின் குடும்பத்தினர் காத்திருக்கின்றனர். "அது தற்கொலையா அல்லது வேறு ஏதேனும் நடந்ததா என்பது எங்களுக்குத் தெரியாது. பிரேதப் பரிசோதனை அறிக்கை உண்மையை வெளிப்படுத்தும்," என்று காவல்துறை தரப்பில் கூறப்பட்டுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
