“ஓரின சேர்க்கையில் ஈடுபட்ட மாணவிகள்” - புகைப்படத்தை வெளியிடுவேன் என சொல்லி மிரட்டல்.. காதலை முறித்த மாணவிக்கு நடந்த சோகம்!

கடலூர் அருகே உள்ள நெல்லிக்குப்பம் பகுதியைச் சேர்ந்தவர் 18 வயதுடைய மாணவி ஸ்ரீமதி. இவர் கடலூர் அருகே உள்ள ஒரு தனியார் கலைக் கல்லூரியில் இரண்டாம் ஆண்டு படித்து வந்தார். அதே கல்லூரியில் ரெட்டிச்சாவடி பகுதியை சேர்ந்த 20 வயதுடைய கயல் என்ற மாணவி மூன்றாம் ஆண்டு படித்து வருகிறார். கல்லூரியில் அவ்வப்போது பார்ப்பது புத்தகங்களை பரிமாறிக்கொள்வது என ஸ்ரீமதி மற்றும் கயலுக்கு இடையே பழக்கம் ஏற்பட்டுள்ளது.

இந்த பழக்கமானது நாளடைவில் காதலாக மாறி பின்னர் தோழிகள் இருவரும் ஓரினச் சேர்க்கையில் ஈடுபட்டு வந்ததாக கூறப்படுகிறது. இதுபற்றி அறிந்த ஸ்ரீமதியின் அண்ணன் கயல் மற்றும் ஸ்ரீமதிக்கு இடையிலான உறவு பற்றி கயலின் அண்ணனிடம் தெரிவித்து தனது தங்கையை கண்டிக்க கூறியுள்ளார். மேலும் தங்களது குடும்ப சூழ்நிலையை எடுத்துக் கூறி தனது ஓரின சேர்க்கையை கைவிடுமாறு ஸ்ரீமதிக்கு வலியுறுத்தியுள்ளார். இதனால் ஸ்ரீமதியும் கயலுடன் பேசுவதை நிறுத்தி உள்ளார்.

இதனால் ஆத்திரமடைந்த கயல், தனது தோழியான ஸ்ரீமதியை தொடர்பு கொண்டு தன்னுடன் பேசாவிட்டால் நாம் இருவரும் ஒன்றாக இருந்த போது எடுத்த புகைப்படத்தை சமூக வலைத்தளங்களில் வெளியிட்டு விடுவேன் என கூறி மிரட்டியதாக சொல்லப்படுகிறது. அதுமட்டுமில்லாமல் ஸ்ரீமதி மற்றும் அவரது தாய் குறித்து அவதூறாக பேசியுள்ளார். இதனால் மனமுடைந்த ஸ்ரீமதி நேற்று தனது வீட்டில் தூக்கு போட்டு தற்கொலை செய்து கொண்டார்.

இதனை பார்த்து அதிர்ச்சியடைந்த ஸ்ரீமதியின் அண்ணன் மற்றும் அவரது தாய் கதறி துடித்துள்ளனர். இவர்களின் சத்தம் கேட்டு வந்த அக்கம் பக்கத்தினர் இது குறித்து போலீசில் தகவல் அளித்துள்ளனர். தகவல் அறிந்து சம்பவ இடத்திற்கு வந்த போலீசார் தற்கொலை செய்து கொண்ட ஸ்ரீமதியின் உடலை கைப்பற்றி பிரேத பரிசோதனைக்காக கடலூர் அரசு மருத்துவமனைக்கு அனுப்பி வைத்தனர். மேலும் வழக்குப்பதிவு செய்து விசாரணை மேற்கொண்ட போலீசார் தற்கொலை செய்து கொண்ட மாணவியின் உருக்கமான கடிதத்தை கைப்பற்றியுள்ளனர்.

அந்த கடிதத்தில் தன்னுடைய உயிரிழப்பிற்கு ஓரினச்சேர்க்கையில் ஈடுபட்ட மாணவி தான் காரணம் என்று தெரிவித்துள்ள நிலையில் அந்த மாணவியை போலீசார் கைது செய்து தற்போது விசாரணை மேற்கொண்டு வருகின்றனர். ஓரினச் சேர்க்கையின்போது ஒன்றாக இருந்த புகைப்படத்தை சமூகவலைத்தளத்தில் வெளியிடுவதாக கூறி தோழி மிரட்டியதால் கல்லூரி மாணவி தூக்குப்போட்டு தற்கொலை செய்து கொண்ட சம்பவம் கடலூர் பகுதி கல்லூரி மாணவ-மாணவிகள் இடையே பெரும் பரபரப்பையும், அதிர்ச்சியையும் ஏற்படுத்தியுள்ளது.

எந்த பிரச்சனைக்கும் தீர்வாகாது, மன உளைச்சல் இருந்தால் அழைக்க வேண்டிய எண்-1800-599-0019.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.