சமையலறையில் தினமும் பயன்படுத்தும் முட்டை... வாங்கும் முன்பும் சமைக்கும் முன்பும் கவனிக்க வேண்டிய விஷயங்கள்!

சமையலறையில் தினமும் பயன்படுத்தப்படும் உணவுப் பொருட்களில் முட்டைக்கும் முக்கிய இடம் உண்டு. காலை உணவு முதல் பேக்கிங் வரை பல வகையான உணவுகளில் பயன்படுத்தப்படும் முட்டை, வெளிப்புறத்தில் பார்க்கும்போது நன்றாகவே தெரிந்தாலும், அது எவ்வளவு fresh-ஆக இருக்கிறது என்பதை வெறும் ஓட்டை பார்த்து எப்போதும் கண்டுபிடிக்க முடியாது. குறிப்பாக முட்டைகள் சில நாட்கள் குளிர்சாதனப் பெட்டியில் இருந்த பிறகு, அவை பயன்படுத்த ஏற்ற நிலையில் உள்ளனவா என்ற சந்தேகம் பலருக்கும் ஏற்படும். இதற்காக வீட்டிலேயே செய்யக்கூடிய ஒரு எளிய தண்ணீர் பரிசோதனை குறித்து உணவு பாதுகாப்பு அமைப்புகள் விழிப்புணர்வு ஏற்படுத்தி வருகின்றன.

இந்த பரிசோதனைக்கு பெரிய உபகரணங்கள் எதுவும் தேவையில்லை. ஒரு கண்ணாடி அல்லது ஆழமான பாத்திரத்தில் தண்ணீர் நிரப்பி, அதில் முட்டையை மெதுவாக விட வேண்டும். முட்டை தண்ணீருக்குள் சென்ற பிறகு அது எந்த நிலையில் இருக்கிறது என்பதை கவனிப்பதே இந்த முறையின் அடிப்படை. புதிய முட்டை பொதுவாக பாத்திரத்தின் அடிப்பகுதியில் கிடைமட்டமாக படுத்திருக்கும். முட்டை சற்று பழையதாகும்போது, அது அடிப்பகுதியில் இருந்தாலும் ஒரு முனை மேல்நோக்கி சாய்ந்த நிலையில் காணப்படலாம். மேலும் வயதான முட்டை செங்குத்தாக நிற்கும் அல்லது தண்ணீரில் மிதக்கக்கூடும்.

இப்படி முட்டையின் நிலை மாறுவதற்கு பின்னால் ஒரு எளிய அறிவியல் காரணம் உள்ளது. முட்டை ஓடு முழுமையாக மூடப்பட்ட பொருள் அல்ல; அதில் மிகச் சிறிய துளைகள் உள்ளன. காலப்போக்கில் முட்டைக்குள் இருக்கும் ஈரப்பதம் மற்றும் சில வாயுக்கள் ஓட்டின் வழியாக வெளியேறுகின்றன. அதே நேரத்தில் முட்டையின் பரந்த பகுதியில் இருக்கும் காற்று அறை பெரிதாகிறது. இதனால் முட்டையின் மொத்த அடர்த்தி மாறி, தண்ணீரில் அது முன்பைவிட அதிகமாக மிதக்கும் தன்மையைப் பெறுகிறது. எனவே, தண்ணீரில் முட்டை மிதப்பது பெரும்பாலும் அது பழையதாகிவிட்டதற்கான அறிகுறியாகும்.

ஆனால் இங்கு ஒரு முக்கியமான விஷயத்தை கவனத்தில் கொள்ள வேண்டும். Water float test என்பது முட்டையின் வயது அல்லது freshness-ஐ மதிப்பிட உதவும் ஒரு சோதனை; அது மட்டும் முட்டை பாதுகாப்பானதா இல்லையா என்பதை உறுதி செய்யும் இறுதி பரிசோதனை அல்ல. அமெரிக்க வேளாண்மைத் துறையான USDA-வும், மிதக்கும் முட்டை தரம் குறைந்ததாக இருக்கலாம் என்றாலும், அது கட்டாயம் கெட்டுப்போயிருக்க வேண்டும் என்று அர்த்தமில்லை என்று விளக்குகிறது. முட்டை வயதாகும்போது அதன் உள்ளேயுள்ள air cell பெரிதாகுவதால்தான் அது மிதக்கிறது.

அதனால் தண்ணீர் பரிசோதனையில் முட்டை மிகவும் பழையதாகத் தெரிந்தால், அடுத்த கட்டமாக அதை நேரடியாக சமையல் பாத்திரத்தில் உடைக்காமல், தனியாக ஒரு சிறிய கிண்ணத்தில் உடைத்து பார்க்கலாம். முட்டையில் இருந்து வரும் வாசனை மிகவும் முக்கியமான அறிகுறியாகும். கெட்டுப்போன முட்டையில் பொதுவாக கடுமையான அழுகிய அல்லது sulfur போன்ற துர்நாற்றம் இருக்கும். அப்படிப்பட்ட வாசனை வந்தால், அதை சமைத்து பயன்படுத்தாமல் உடனடியாக தூக்கி எறிவதே பாதுகாப்பானது.

முட்டையின் உள்ளடக்கத்தையும் கவனிக்க வேண்டும். புதிய முட்டையில் மஞ்சள் கரு பொதுவாக உயரமாகவும் உறுதியான வடிவத்துடனும் இருக்கும்; வெள்ளைக்கரு தடிமனாக இருந்து அதிகமாக பரவாமல் இருக்கும். முட்டை பழையதாகும்போது வெள்ளைக்கரு மெதுவாக நீர்த்துப் பரவக்கூடும். FSSAI வெளியிட்ட வழிகாட்டுதலிலும், புதிய முட்டையில் மஞ்சள் கரு உயரமாகவும், வெள்ளைக்கரு அடர்த்தியாகவும் இருப்பதாகவும், வயதான முட்டைகளில் வெள்ளைக்கரு அதிகமாக நீர்த்துப் போகலாம் என்றும் குறிப்பிடப்பட்டுள்ளது.

முட்டையை வாங்கும்போதே சில அடிப்படை விஷயங்களை கவனிப்பதும் முக்கியம். ஓட்டில் விரிசல் இருக்கிறதா, அழுக்கு அல்லது பூஞ்சை போன்றவை உள்ளனவா என்பதை பார்க்க வேண்டும். உடைந்த ஓடு வழியாக பாக்டீரியா உள்ளே செல்லும் வாய்ப்பு இருப்பதால், சேதமடைந்த முட்டைகளை தவிர்ப்பது நல்லது. அதேபோல், வாங்கிய முட்டைகளை சரியான குளிர்சாதன நிலையில் வைத்திருப்பதும் அவற்றின் தரத்தை பாதுகாக்க உதவும். FSSAI வழிகாட்டுதலின்படி, முட்டைகளை தனியாக முட்டைத் தட்டில் வைத்து சேமிப்பதும், வலுவான வாசனை கொண்ட உணவுகளிலிருந்து விலக்கி வைப்பதும் பரிந்துரைக்கப்படுகிறது.

முட்டையின் freshness-ஐ அறிய இந்த தண்ணீர் சோதனை மிகவும் எளிமையானது என்பதால், சமையலறையில் பயனுள்ள ஒரு ஆரம்ப பரிசோதனையாக இருக்கலாம். ஆனால் முட்டை மிதந்துவிட்டது என்பதற்காக மட்டும் அது நிச்சயம் கெட்டுப்போனது என்றும், மூழ்கிவிட்டது என்பதற்காக மட்டும் அது முழுமையாக பாதுகாப்பானது என்றும் முடிவு செய்யக்கூடாது. ஓட்டின் நிலை, முட்டையை உடைத்தபின் கிடைக்கும் வாசனை, உள்ளடக்கத்தின் தோற்றம், சேமிப்பு முறை மற்றும் பயன்படுத்த வேண்டிய காலம் ஆகிய அனைத்தையும் சேர்த்தே மதிப்பிட வேண்டும். உணவுப் பாதுகாப்பில் சிறிய கவனக்குறைவும் பெரிய பிரச்சினையை ஏற்படுத்தக்கூடும் என்பதால், சந்தேகம் இருந்தால் அந்த முட்டையை பயன்படுத்தாமல் இருப்பதே பாதுகாப்பான முடிவாகும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்