பான் - ஆதார் லிங்க் பண்ணலையா? உங்கள் வங்கி கணக்கு முடங்கும் அபாயம்! 2 நிமிடத்தில் இணைப்பது எப்படி?

இந்தியாவில் வருமான வரித்துறை விதிகளின்படி, ஒவ்வொரு குடிமகனும் தனது பான் கார்டு மற்றும் ஆதார் எண்ணை இணைப்பது சட்டப்படி கட்டாயமாக்கப்பட்டுள்ளது. இந்த இணைப்பைச் செய்யத் தவறினால், உங்கள் பான் கார்டு செல்லாததாக அறிவிக்கப்படும். இதனால் வங்கிப் பரிவர்த்தனைகள் பாதிப்பதோடு, அதிகப்படியான வரி பிடித்தம் (TDS) செய்யப்படும் அபாயமும் உள்ளது. ஏற்கனவே அபராதக் காலம் தொடங்கிவிட்டதால், 1,000 ரூபாய் அபராதத்துடன் இந்த இணைப்பை எப்படிச் சரியாகச் செய்வது என்பதைப் படிப்படியாக இங்கே பார்க்கலாம்.

ஸ்டெப் 1: முதலில் வருமான வரித்துறையின் அதிகாரப்பூர்வமான 'இ-ஃபைலிங்' (e-Filing) இணையதளத்திற்கு (www.incometax.gov.in) செல்ல வேண்டும். இந்தத் தளத்தில் இடதுபுறம் உள்ள 'Quick Links' என்ற பகுதியில் 'Link Aadhaar' என்ற விருப்பத்தைத் தேர்ந்தெடுக்கவும். போலி இணையதளங்களைத் தவிர்த்து, அரசுத் தளத்தை மட்டுமே பயன்படுத்துவதை உறுதி செய்து கொள்ளுங்கள்.

ஸ்டெப் 2: இப்போது திரையில் தோன்றும் பக்கத்தில் உங்கள் 10 இலக்க பான் (PAN) எண் மற்றும் 12 இலக்க ஆதார் (Aadhaar) எண்ணை உள்ளிட வேண்டும். விவரங்களை உள்ளிட்ட பிறகு, 'Validate' என்ற பொத்தானைக் கிளிக் செய்யவும். ஒருவேளை நீங்கள் ஏற்கனவே இணைத்திருந்தால், அது குறித்த தகவல் திரையில் தோன்றும்.

ஸ்டெப் 3: உங்கள் பான்-ஆதார் இன்னும் இணைக்கப்படவில்லை என்றால், 1,000 ரூபாய் அபராதம் செலுத்தக் கோரும் செய்தி வரும். இதற்கு 'Continue to Pay Through e-Pay Tax' என்பதைத் தேர்ந்தெடுத்து, உங்கள் பான் எண் மற்றும் மொபைல் எண்ணை உள்ளிட்டு OTP மூலம் உறுதிப்படுத்த வேண்டும். பின்னர் 'Assessment Year' என்பதில் நடப்பு ஆண்டைத் (2025-26) தேர்ந்தெடுத்து, 'Other Receipts (500)' என்ற பிரிவின் கீழ் கட்டணத்தைச் செலுத்த வேண்டும்.

ஸ்டெப் 4: கட்டணம் செலுத்திய 4 முதல் 5 வேலை நாட்களுக்குப் பிறகு, மீண்டும் அதே 'Link Aadhaar' பகுதிக்குச் சென்று விவரங்களை உள்ளிடவும். இப்போது உங்கள் கட்டணம் உறுதி செய்யப்பட்டதைக் காட்டும். அங்கு 'Continue' கொடுத்து, ஆதார் கார்டில் உள்ளபடி உங்கள் பெயர் மற்றும் மொபைல் எண்ணைப் பதிவிடவும். இறுதியாக 'Link Aadhaar' என்பதைக் கிளிக் செய்தால், உங்கள் கோரிக்கை வருமான வரித்துறையின் சரிபார்ப்பிற்கு அனுப்பப்படும்.

ஸ்டெப் 5: சில நாட்களுக்குப் பிறகு 'Link Aadhaar Status' என்ற பகுதிக்குச் சென்று, உங்கள் இணைப்பு வெற்றிகரமாக முடிந்துவிட்டதா என்பதைச் சரிபார்த்துக் கொள்ளலாம். பெயர் அல்லது பிறந்த தேதியில் மாற்றங்கள் இருந்தால் இந்த இணைப்பு தோல்வியடையலாம், எனவே இரண்டு ஆவணங்களிலும் விவரங்கள் சரியாக இருப்பதை உறுதி செய்யவும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.