கடல் நண்டு மசாலா! நண்டுச் சதை குலையாமல் காரசாரமாகச் செய்வது எப்படி?

நம்ம ஊர் கடலோரப் பகுதிகள்ல மீனுக்கு அப்புறம் ரொம்பவே விரும்பிச் சாப்பிடக்கூடிய ஒரு உணவு நண்டு. "சளி பிடிச்சிருந்தா ஒரு நண்டு ரசம் வச்சுக் குடிச்சா உடனே சரியாகிடும்"னு பெரியவங்க சொல்லுவாங்க. நண்டுச் சதைக்குன்னு ஒரு தனி இனிப்புச் சுவை உண்டு. ஆனா, பல பேர் நண்டு சமைக்கத் தயங்குறதுக்கு ரெண்டு காரணங்கள் உண்டு. ஒன்னு, நண்டைச் சுத்தம் செய்யுறது கஷ்டம்னு நினைப்பாங்க. இன்னொன்னு, சமைக்கும்போது நண்டுச் சதை எல்லாம் குழஞ்சு மசாலாவோட கலந்துடும், அப்புறம் நண்டை உடைச்சுச் சாப்பிடும்போது உள்ள சதை இருக்காது. நண்டுச் சதை குலையாம, அதே சமயம் மசாலா எல்லாம் உள்ள இறங்கி காரசாரமா ஒரு நண்டு மசாலா செய்யுறதுல சில நுணுக்கங்கள் இருக்கு. அந்த அசல் கடல் நண்டு மசாலாவை எப்படிச் செய்யுறதுன்னு இப்போ விரிவா பார்ப்போம்.

முதல்ல நண்டைச் சுத்தம் செய்யுறதுதான் ரொம்ப முக்கியமான வேலை. நண்டை வாங்கிட்டு வந்ததும் அதோட கால்களைத் தனியா பிரிச்சுக்கோங்க. நண்டோட முதுகுப் பகுதியில இருக்குற அந்த ஓட்டை மெதுவா நீக்கிட்டு, உள்ள இருக்குற தேவையில்லாத பகுதிகளைச் சுத்தம் செய்யணும். நண்டைச் சுத்தம் செஞ்ச அப்புறம், அதுல கொஞ்சம் மஞ்சள் தூள் அப்புறம் கல்லுப்பு சேர்த்து நாலஞ்சு தடவை நல்லா அலசணும். இப்படிச் செஞ்சாதான் அந்தப் பிசுபிசுப்பும் கவுச்சி வாசனையும் போகும். நண்டோட பெரிய கால்களை ஒரு அம்மியிலயோ இல்ல இடிக்கிற கல்லுலயோ லேசா ஒரு தட்டு தட்டிக்கோங்க. இப்படிச் செய்யுறதுனாலதான் நாம செய்யப்போற மசாலா அந்த ஓட்டுக்குள்ள இறங்கிச் சதைக்கு ருசியைக் கொடுக்கும்.

இப்போ இந்த மசாலாவுக்குத் தேவையான ஒரு ஸ்பெஷல் பொடியைத் தயார் செய்யலாம். ஒரு வாணலியில ரெண்டு ஸ்பூன் மிளகு, ஒரு ஸ்பூன் சீரகம், அரை ஸ்பூன் சோம்பு அப்புறம் நாலஞ்சு காய்ந்த மிளகாய் சேர்த்து வறுத்துக்கோங்க. நண்டு மசாலாவுக்கு மிளகுதான் ராஜா. மிளகு எவ்வளவுக்கு எவ்வளவு அதிகமா இருக்குதோ, அந்தளவுக்கு நண்டு ருசியாவும் மருத்துவ குணம் வாய்ந்ததாவும் இருக்கும். வறுத்த பொருட்களை ஆற வச்சு நல்லா கொரகொரப்பா பொடி செஞ்சு வச்சுக்கோங்க. நண்டுக்கு ரொம்ப நைஸா அரைக்கிறதை விட, இந்த மாதிரி இடிச்சுப் போடுற மசாலாதான் நல்ல ருசியைக் கொடுக்கும்.

அடுத்ததா ஒரு அகலமான வாணலியை அடுப்புல வச்சு நாலு ஸ்பூன் நல்லெண்ணெய் ஊத்திக்கோங்க. எண்ணெய் காஞ்சதும் கொஞ்சம் சோம்பு, ஒரு துண்டு பட்டை, ரெண்டு லவங்கம் அப்புறம் நிறைய கறிவேப்பிலை சேர்த்துத் தாளிங்க. இதுல ரெண்டு பெரிய வெங்காயத்தைப் பொடியா நறுக்கிச் சேர்த்துக்கோங்க. வெங்காயம் நல்லா வதங்கிப் பொன்னிறமா வர்றப்போ, ஒரு ஸ்பூன் இஞ்சி பூண்டு விழுது சேர்த்து பச்சை வாசனை போற வரைக்கும் கிளறுங்க. வெங்காயம் எவ்வளவுக்கு எவ்வளவு வதங்குதோ, அந்தளவுக்கு மசாலா திக்கா கிடைக்கும். வெங்காயம் வதங்குனதுக்கு அப்புறம் ரெண்டு பழுத்த தக்காயைப் பொடியா நறுக்கிச் சேர்த்து வதக்குங்க.

தக்காளி நல்லா மசிஞ்சு தொக்கு மாதிரி வரும்போது, ஒரு ஸ்பூன் மிளகாய்த் தூள், ரெண்டு ஸ்பூன் மல்லித் தூள் அப்புறம் அரை ஸ்பூன் மஞ்சள் தூள் சேர்த்துக்கோங்க. மசாலா கருகிடாம இருக்கக் கொஞ்சமா தண்ணி தெளிச்சு விடுங்க. இப்போ நாம சுத்தம் செஞ்சு வச்சிருக்க நண்டுகளை உள்ள சேர்க்கணும். நண்டைச் சேர்த்த உடனே ஒரு அஞ்சு நிமிஷம் அந்த மசாலாவுலேயே நல்லா பிரட்டி விடுங்க. நண்டு வேகும்போது அதோட நிறம் லேசா மாறத் தொடங்கும். இப்போ நண்டு வேகுறதுக்கு மட்டும் ஒரு அரை கப் தண்ணி ஊத்தி, தேவையான அளவு உப்பு சேர்த்து மூடி வைங்க. நண்டு வேகுறதுக்கு அதிக நேரம் எடுக்காது, ஒரு பத்து நிமிஷம் மிதமான தீயில இருந்தாலே போதும்.

நண்டு வெந்து அந்த மசாலா எல்லாம் திக்கா வரும்போது, நாம அரைச்சு வச்சிருக்க அந்த மிளகு சீரகப் பொடியைத் தாராளமா தூவுங்க. இப்போதான் அந்த முக்கியமான ரகசியம்: நண்டை ரொம்ப வேகமா கரண்டியால போட்டுத் திருப்பக்கூடாது. அப்படிச் செஞ்சாதான் அந்த ஓட்டுக்குள்ள இருக்குற சதை வெளிய வராம, முழுசா அப்படியே இருக்கும். மெதுவா மசாலாவை நண்டு மேல எடுத்து விடுங்க. ஒரு ரெண்டு நிமிஷம் கழிச்சுப் பார்த்தீங்கன்னா, எண்ணெய் பிரிஞ்சு அந்த மிளகு வாசனை ஊரையே மணக்கும். கடைசியா நிறைய பொடியா நறுக்குன மல்லித்தழையைத் தூவி இறக்குனீங்கன்னா, கமகமக்கும் கடல் நண்டு மசாலா தயார்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.