.png)
நோய்த்தொற்று ஏற்பட்டால் மருத்துவர்கள் பரிந்துரைக்கும் முக்கியமான மருந்துகளில் ஆன்டிபயாட்டிக்கும் ஒன்று. உடலில் தீங்கு விளைவிக்கும் பாக்டீரியாக்களை கட்டுப்படுத்துவதில் இவை முக்கிய பங்கு வகிக்கின்றன. ஆனால், ஆன்டிபயாட்டிக் மருந்துகள் தீங்கு விளைவிக்கும் பாக்டீரியாக்களுடன் சேர்த்து, உடலுக்கு நன்மை செய்யும் சில குடல் நுண்ணுயிரிகளையும் பாதிக்கக்கூடும். இந்நிலையில், மருந்து எடுத்துக்கொள்ளும் காலத்தில் நாம் சாப்பிடும் உணவும் குடல் ஆரோக்கியத்தில் தாக்கத்தை ஏற்படுத்தலாம் என்று புதிய ஆய்வு சுட்டிக்காட்டியுள்ளது.
குறிப்பாக அதிக அளவு சர்க்கரை உள்ள உணவுகள் மற்றும் பானங்களை ஆன்டிபயாட்டிக் சிகிச்சையுடன் சேர்த்து எடுத்துக்கொள்ளும்போது, குடலில் உள்ள நல்ல மற்றும் கெட்ட நுண்ணுயிரிகளின் சமநிலை மேலும் சீர்குலைய வாய்ப்பு இருப்பதாக ஆய்வாளர்கள் கண்டறிந்துள்ளனர். இதன் காரணமாக சில தீங்கு விளைவிக்கக்கூடிய பாக்டீரியாக்கள் அதிகமாக வளரக்கூடிய சூழல் உருவாகலாம். இந்த ஆய்வில் முக்கியமாக கவனிக்கப்பட்டது ‘என்டரோக்காக்கஸ்’ (Enterococcus) என்ற பாக்டீரியா. பொதுவாக குடலில் இருக்கும் பல்வேறு நுண்ணுயிரிகளுக்கு இடையே ஒரு சமநிலை காணப்படும். ஆன்டிபயாட்டிக் பயன்பாட்டால் அந்த சமநிலை பாதிக்கப்படும்போது, சில பாக்டீரியாக்கள் மற்றவற்றைவிட அதிகமாக பெருகும் நிலை ஏற்படலாம்.
அதிக சர்க்கரை உட்கொள்ளும் சூழலில் என்டரோக்காக்கஸ் அதிகரிக்கும் போக்கு காணப்பட்டதாக ஆய்வு தெரிவிக்கிறது. இந்த முடிவுக்கு வருவதற்காக, எலும்பு மஜ்ஜை அல்லது ஸ்டெம் செல் மாற்று சிகிச்சை பெற்ற 173 நோயாளிகளின் உணவு மற்றும் குடல் நுண்ணுயிரிகளை ஆய்வாளர்கள் தொடர்ந்து கண்காணித்தனர். இவர்களில் பெரும்பாலானோர் நோய்த்தொற்றுகளைத் தடுப்பதற்கும் சிகிச்சையளிப்பதற்கும் ஆன்டிபயாட்டிக் மருந்துகளைப் பெற்றிருந்தனர்.
40,000-க்கும் மேற்பட்ட உணவு பதிவுகளும், 1,000-க்கும் அதிகமான மல மாதிரிகளும் ஆய்வுக்கு பயன்படுத்தப்பட்டன. ஆய்வில் கிடைத்த தகவலின்படி, ஆன்டிபயாட்டிக் பயன்படுத்திய காலகட்டத்தில் சர்க்கரை அதிகம் உள்ள உணவுகளை எடுத்துக்கொண்டவர்களின் குடல் நுண்ணுயிரிகளின் பல்வகைத் தன்மை குறைந்தது. குறிப்பாக, உணவில் சர்க்கரை அளவு ஒவ்வொரு 100 கிராம் அதிகரிக்கும் போதும், குடல் நுண்ணுயிரிகளின் பல்வகைத் தன்மை மேலும் குறையும் தொடர்பு காணப்பட்டது. இங்கு 100 கிராம் என்பது சுமார் இரண்டு கேன் குளிர்பானங்களில் இருக்கும் சர்க்கரை அளவுக்கு சமமானதாக ஆய்வாளர்கள் விளக்கியுள்ளனர்.
இதில் இன்னொரு சுவாரஸ்யமான விஷயமும் உள்ளது. உடல்நிலை சரியில்லாதவர்கள் சாப்பிட முடியாத நேரங்களில், ஊட்டச்சத்து பானங்கள், ஸ்மூத்திகள் அல்லது சில வகையான சத்துப்பானங்கள் வழங்கப்படுவது வழக்கம். ஆனால் இவற்றில் சர்க்கரை அதிகமாக இருந்தால், ஆன்டிபயாட்டிக் சிகிச்சை பெறும் சில நோயாளிகளின் குடல் நுண்ணுயிரிகளுக்கு அது சாதகமாக இருக்காமல் இருக்கலாம் என்ற கேள்வியை இந்த ஆய்வு எழுப்பியுள்ளது. இந்த தொடர்பை உறுதிப்படுத்த ஆய்வாளர்கள் எலிகளிலும் சோதனை நடத்தினர்.
ஆன்டிபயாட்டிக் மருந்து வழங்கப்பட்டு, அதிக சர்க்கரை கொண்ட உணவு கொடுக்கப்பட்ட எலிகளில் என்டரோக்காக்கஸ் பாக்டீரியா அதிகமாக பெருகியது. மேலும், சர்க்கரை காரணமாக இந்த பாக்டீரியாவின் அதிகரிப்பு நீண்ட நேரம் நீடித்ததாகவும் கண்டறியப்பட்டது. ஆனால் ஆன்டிபயாட்டிக் இல்லாமல் சர்க்கரை மட்டும் வழங்கப்பட்ட எலிகளில் இதே அளவிலான அதிகரிப்பு காணப்படவில்லை. இதனால் சர்க்கரையும் ஆன்டிபயாட்டிக்கும் சேரும்போது குடல் நுண்ணுயிரிகளின் சமநிலை அதிகமாக பாதிக்கப்படலாம் என்ற கருத்துக்கு ஆய்வு ஆதரவு அளிக்கிறது.
அதே நேரத்தில், இந்த முடிவை எல்லா ஆன்டிபயாட்டிக் பயன்படுத்துபவர்களுக்கும் நேரடியாகப் பொருத்திப் பார்க்க முடியாது என்பதையும் ஆய்வாளர்கள் தெளிவுபடுத்தியுள்ளனர். மனிதர்களில் செய்யப்பட்ட ஆய்வு பெரும்பாலும் எலும்பு மஜ்ஜை மற்றும் ஸ்டெம் செல் மாற்று சிகிச்சை பெறும் நோயாளிகளை மையமாகக் கொண்டது. இவர்களுக்கு கீமோதெரபி, கதிர்வீச்சு சிகிச்சை உள்ளிட்ட பல்வேறு சிகிச்சைகளும் வழங்கப்படுவதால், குடல் நுண்ணுயிரிகளில் ஏற்படும் மாற்றங்களுக்கு பல காரணிகள் இருக்கலாம். ஆரோக்கியமான ஒருவர் சாதாரண தொற்றுக்காக ஆன்டிபயாட்டிக் எடுத்துக்கொள்ளும்போது இதே விளைவு ஏற்படுமா என்பது குறித்து இன்னும் ஆய்வு தேவைப்படுகிறது.
எனவே, ஆன்டிபயாட்டிக் மருந்து எடுத்துக்கொள்ளும் போது சர்க்கரையை முற்றிலும் தவிர்க்க வேண்டும் என்று இந்த ஆய்வு கூறவில்லை. ஆனால் குறிப்பாக அதிக சர்க்கரை கொண்ட குளிர்பானங்கள், இனிப்புகள் மற்றும் பதப்படுத்தப்பட்ட உணவுகளை அளவுக்கு அதிகமாக எடுத்துக்கொள்வதைத் தவிர்ப்பது குறித்து கவனம் செலுத்த வேண்டியதன் அவசியத்தை இந்த கண்டுபிடிப்புகள் காட்டுகின்றன. முக்கியமாக, மருத்துவர் பரிந்துரைத்த ஆன்டிபயாட்டிக் மருந்தை தானாக நிறுத்தவோ, அளவை மாற்றவோ கூடாது. உணவு தொடர்பான சந்தேகம் இருந்தால், சிகிச்சை அளிக்கும் மருத்துவரிடம் ஆலோசிப்பதே பாதுகாப்பான வழியாகும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
