செயற்கை நுண்ணறிவுத் துறையில் உலக அளவில் கவனம் ஈர்த்துள்ள நிறுவனங்களில் ஒன்றான ஆந்த்ரோபிக் (Anthropic), பங்குச் சந்தையில் கால்பதித்த முதல் நாளிலேயே முதலீட்டாளர்களிடையே பெரும் எதிர்பார்ப்பை ஏற்படுத்தியது. ஆனால், அந்த உற்சாகம் நீண்ட நேரம் நீடிக்கவில்லை. வரலாற்றுச் சாதனையுடன் தொடங்கிய அதன் பங்கு வர்த்தகம், அடுத்த நாளே கடுமையான சரிவைச் சந்தித்தது. இதனால் அதிக விலைக்கு பங்குகளை வாங்கிய சிறு முதலீட்டாளர்கள் நஷ்டத்தை எதிர்கொள்ளும் நிலை உருவானது.
ஆந்த்ரோபிக் நிறுவனம், செயற்கை நுண்ணறிவு உதவியாளரான கிளாட் (Claude) தொழில்நுட்பத்தை உருவாக்கிய நிறுவனம். உலகம் முழுவதும் ஏஐ பயன்பாடு வேகமாக அதிகரித்து வரும் நிலையில், அந்தத் துறையில் முக்கிய நிறுவனமாக வளர்ந்துள்ள ஆந்த்ரோபிக் பங்குச் சந்தைக்கு வருவது முதலீட்டாளர்களிடம் மிகுந்த எதிர்பார்ப்பை ஏற்படுத்தியது. இதன் ஆரம்பப் பொதுப் பங்கு வெளியீட்டில் (IPO) ஒரு பங்கின் விலை 83 அமெரிக்க டாலராக நிர்ணயிக்கப்பட்டது. மொத்தம் 98 கோடி பங்குகள் இந்த விலையில் விற்பனைக்கு வந்தன. இது பங்குச் சந்தை வரலாற்றிலேயே மிகப்பெரிய IPO-க்களில் ஒன்றாகக் கருதப்பட்டது.
வியாழக்கிழமை பங்குச் சந்தையில் வர்த்தகம் தொடங்கியபோது, எதிர்பார்ப்புகளைத் தாண்டி ஒரு பங்கு 112 டாலருக்கு விற்பனையானது. IPO விலையுடன் ஒப்பிடும்போது இது குறிப்பிடத்தக்க உயர்வாகும். இதனால் ஆரம்பத்திலேயே பங்குகளை வாங்கிய முதலீட்டாளர்கள் நல்ல லாபம் கிடைக்கும் என்ற நம்பிக்கையில் இருந்தனர். ஆனால், அன்றைய வர்த்தகம் முடிவடையும்போது பங்கு விலை 97 டாலராகக் குறைந்தது. அடுத்த நாளான வெள்ளிக்கிழமை சரிவு மேலும் தீவிரமடைந்தது. அமெரிக்க நேரப்படி பிற்பகல் 12.20 மணியளவில் பங்கு விலை 85 டாலர் வரை இறங்கியது. முந்தைய நாள் இறுதி விலையிலிருந்து கணக்கிடும்போது இது சுமார் 13 சதவீத சரிவாகும்.
இந்த திடீர் வீழ்ச்சியால் அதிக விலையில் பங்குகளை வாங்கிய முதலீட்டாளர்கள் அதிர்ச்சியடைந்தனர். குறிப்பாக, தனிநபர் முதலீட்டாளர்கள் முதல் நாள் வர்த்தகத்தில் பெருமளவில் பங்குகளை வாங்கியிருந்தனர். அந்த ஒரே நாளில் ஆந்த்ரோபிக் பங்குகளில் 75 கோடி டாலருக்கும் அதிகமான மதிப்பில் தனிநபர் முதலீட்டாளர்களின் பரிவர்த்தனைகள் நடைபெற்றதாகக் கணிக்கப்பட்டுள்ளது. ஒரு நிறுவனம் பங்குச் சந்தையில் அறிமுகமான முதல் நாளில் பதிவான மிக அதிகமான தனிநபர் முதலீட்டாளர் வர்த்தக மதிப்புகளில் இதுவும் ஒன்றாகும். இதற்கு முன்பு ஸ்பேஸ்எக்ஸ் நிறுவனம் பங்குச் சந்தையில் அறிமுகமானபோது பதிவான 67 கோடி டாலர் மதிப்பிலான பரிவர்த்தனையையும் இது கடந்ததாகக் கூறப்படுகிறது.
பங்குகளை வாங்குவதற்கு முதலீட்டாளர்கள் காட்டிய ஆர்வத்துக்கு ஏற்ப அனைவருக்கும் பங்குகள் கிடைக்கவில்லை. ஆந்த்ரோபிக் தனது மொத்தப் பங்குகளில் 20 சதவீதத்துக்கும் குறைவானவற்றையே தனிநபர் முதலீட்டாளர்களுக்கு ஒதுக்கியிருந்தது. பெரிய நிறுவனங்கள் மற்றும் முதலீட்டு அமைப்புகளிடமிருந்து அதிக தேவை இருந்ததால், சிறு முதலீட்டாளர்களுக்கான ஒதுக்கீடு எதிர்பார்த்ததைவிடக் குறைந்ததாகத் தெரிவிக்கப்பட்டது. இதனால் பங்குகளை வாங்க விரும்பிய பலருக்கும் அவர்கள் கேட்ட அளவு பங்குகள் கிடைக்கவில்லை.
இங்கிலாந்தில் மட்டும் சுமார் 36 லட்சம் பங்குகள், 30 கோடி டாலர் மதிப்பில் தனிநபர் முதலீட்டாளர்களுக்கு ஒதுக்கப்பட்டிருந்தன. அங்குள்ள முதலீட்டு தளத்தின் வாடிக்கையாளர்கள் தாங்கள் கேட்ட பங்குகளில் 34 சதவீதத்தை மட்டுமே பெற்றதாகத் தகவல் வெளியானது. இதன் மூலம் ஆந்த்ரோபிக் பங்குகளுக்கு உலக அளவில் எவ்வளவு தேவை இருந்தது என்பதைப் புரிந்துகொள்ள முடிகிறது.
பங்குச் சந்தையில் அதிக தேவை இருப்பது மட்டுமே ஒரு நிறுவனத்தின் பங்கு விலை தொடர்ந்து உயரும் என்பதற்கான உத்தரவாதம் அல்ல என்பதை இந்தச் சம்பவம் மீண்டும் உணர்த்தியுள்ளது. முதல் நாளில் பங்குகளை வாங்குவதற்காக முதலீட்டாளர்கள் காட்டிய ஆர்வம், அடுத்த நாளில் ஏற்பட்ட விற்பனை அழுத்தத்தைத் தடுக்க முடியவில்லை. மேலும், உலகப் பங்குச் சந்தைகளிலும் வெள்ளிக்கிழமை சரிவு காணப்பட்டது. செயற்கை நுண்ணறிவுத் துறையில் முதலீடு செய்யப்படும் மிகப்பெரிய தொகைக்கு ஏற்ற வருமானம் கிடைக்குமா என்ற கேள்வியும் முதலீட்டாளர்களிடையே எழுந்துள்ளது.
AI மாடல்களைப் கற்றுக்கொடுப்பது, அதற்குத் தேவையான கணினி வசதிகளை உருவாக்குவது, பிரம்மாண்டமான தரவு மையங்களை அமைப்பது என இத்துறையில் நிறுவனங்கள் பெரும் தொகையைச் செலவிட்டு வருகின்றன. ஆனால், இந்த முதலீடுகள் எதிர்காலத்தில் போதுமான வருமானத்தை உருவாக்குமா என்பதில் இன்னும் சில முதலீட்டாளர்களுக்கு சந்தேகம் உள்ளது. இந்தக் கவலைகளும் ஏஐ நிறுவனங்களின் பங்குகள் மீது அழுத்தத்தை ஏற்படுத்தியிருக்கலாம்.
IPO மூலம் ஒரு நிறுவனம் பங்குச் சந்தைக்கு வரும்போது, அதன் வளர்ச்சியை நம்பி முதலீட்டாளர்கள் பங்குகளை வாங்குகின்றனர். ஆனால், ஆரம்ப நாட்களில் ஏற்படும் விலை ஏற்ற இறக்கங்கள் அதிகமாக இருக்கலாம். ஒரு பங்கு முதல் நாளில் உயர்ந்த விலைக்குச் சென்றுவிட்டது என்பதற்காக அதை உடனடியாக வாங்குவது ஆபத்தான முடிவாக மாறக்கூடும். நிறுவனத்தின் வருமானம், செலவுகள், எதிர்கால வளர்ச்சித் திட்டங்கள், சந்தைப் போட்டி மற்றும் பங்கின் மதிப்பீடு போன்றவற்றை ஆராய்ந்த பிறகே முதலீட்டு முடிவை எடுக்க வேண்டும்.
Anthropic பங்குகளின் முதல் நாள் உற்சாகமும் அடுத்த நாள் சரிவும், ஏஐ துறையின் வளர்ச்சி மீதான நம்பிக்கைக்கும் பங்குச் சந்தையின் நிச்சயமற்ற தன்மைக்கும் இடையிலான வேறுபாட்டை வெளிப்படுத்தியுள்ளது. தொழில்நுட்பத்தின் எதிர்காலம் பிரகாசமாக இருக்கலாம். ஆனால், அந்தத் துறையில் செயல்படும் ஒவ்வொரு நிறுவனத்தின் பங்கும் தொடர்ந்து லாபம் தரும் என்று உறுதியாகக் கூற முடியாது. முதலீட்டாளர்கள் நினைவில் கொள்ள வேண்டிய முக்கியமான பாடம் இதுதான்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.