.png)
ஒரு காலத்தில் இந்திய கிரிக்கெட் அணியின் ஜெர்சியில் இடம் பிடித்து, பல பில்லியன் டாலர் மதிப்பில் உலகையே வியக்க வைத்த பைஜூஸ் நிறுவனம், இன்று மிக மோசமான சரிவை சந்தித்து வருகிறது. அதன் நிறுவனர் பைஜூ ரவீந்திரன், சிங்கப்பூர் நீதிமன்றத்தால் ஆறு மாதங்கள் சிறைத்தண்டனை விதிக்கப்பட்டுள்ளார். தனது சொத்து விவரங்களை மறைத்ததற்காகவும், நீதிமன்ற உத்தரவுகளை மதிக்காததற்காகவும் இந்த தண்டனை வழங்கப்பட்டுள்ளது. இந்திய ஸ்டார்ட்அப் வரலாற்றிலேயே இவ்வளவு பெரிய வீழ்ச்சியை சந்தித்த நிறுவனம் இதுதான் என்றால் அது மிகையல்ல.
தொடக்கத்தில் கல்வியில் தொழில்நுட்பத்தை புகுத்தி, இந்திய மாணவர்களிடம் மிகப்பெரிய வரவேற்பை பெற்ற இந்த நிறுவனம், கோவிட் பெருந்தொற்று காலத்தின் போது அபரிமிதமான வளர்ச்சியை கண்டது. கல்வி நிலையங்கள் மூடப்பட்ட சூழலில், பைஜூஸ் கல்வித் துறையின் எதிர்காலமாகவே பார்க்கப்பட்டது. உலக முதலீட்டாளர்கள் கோடி கோடியாக முதலீடு செய்ய, நிறுவனம் பல நிறுவனங்களை வாங்கி தன் சாம்ராஜ்யத்தை விரிவுபடுத்தியது. ஆனால், இந்த வேகமான வளர்ச்சிக்கு பின்னால் பெரும் நிதி நெருக்கடிகளும், நிர்வாக சிக்கல்களும் மெல்ல மெல்ல உருவாகிக் கொண்டிருந்தன. நிறுவனத்தின் வீழ்ச்சிக்கு முக்கிய காரணமாக அமைந்தது 2021-ஆம் ஆண்டு வெளிநாடுகளில் பெற்ற 1.2 பில்லியன் டாலர் கடன்.
இந்த பணத்தை விரிவாக்கத்திற்கு பயன்படுத்துவதாக கூறிய நிறுவனம், முறையான கணக்கு வழக்குகளை காட்டத் தவறியது. தணிக்கையாளர்கள் நிறுவனத்திலிருந்து விலகியது முதலீட்டாளர்களுக்கு பெரும் அதிர்ச்சியை கொடுத்தது. ஒரு கட்டத்தில் நிறுவனத்தின் இழப்பு பல ஆயிரம் கோடியாக உயர்ந்தது. இதன் தொடர்ச்சியாக, வெளிநாட்டு கடன் கொடுத்தவர்கள் பைஜூஸ் நிறுவனம் தங்கள் பணத்தை முறைகேடாக கையாண்டதாக குற்றம் சாட்டத் தொடங்கினர்.இந்த விவகாரம் அமெரிக்கா மற்றும் சிங்கப்பூர் நீதிமன்றங்களுக்கு சென்றது. முக்கியமாக, சிங்கப்பூரில் கத்தார் முதலீட்டு ஆணையத்தின் துணை நிறுவனம் ஒன்று பைஜூ ரவீந்திரனுக்கு எதிராக வழக்கு தொடர்ந்தது. சொத்து விவரங்களை சமர்ப்பிக்கவும், உரிமை ஆவணங்களை வழங்கவும் நீதிமன்றம் பலமுறை உத்தரவிட்டும் அவர் அதை செய்யவில்லை.
இதனாலேயே அவருக்கு இப்போது சிறைத்தண்டனை கிடைத்துள்ளது. இதனுடன், சுமார் 67 லட்சம் ரூபாய் அபராதமும் செலுத்த உத்தரவிடப்பட்டுள்ளது. இந்த சட்ட போராட்டங்களுக்கு நடுவே, இந்தியாவில் நிறுவனத்திற்கு எதிராக திவால் நடைமுறைகளும் தொடங்கப்பட்டுவிட்டன. கிரிக்கெட் கட்டுப்பாட்டு வாரியத்திற்கு கொடுக்க வேண்டிய 158 கோடி ரூபாய் பாக்கியே இந்த திவால் நடவடிக்கைக்கு ஒரு சிறிய காரணமாக அமைந்தது. ஒரு காலத்தில் சந்தைப்படுத்துதலில் கோலோச்சிய அதே நிறுவனம், இன்று சம்பளம் கூட கொடுக்க முடியாமல் தவிப்பது சோகமான உண்மை. நிறுவனத்தின் மதிப்பு உச்சத்தில் இருந்த 22 பில்லியன் டாலரிலிருந்து, தற்போது பூஜ்ஜியத்திற்கு வந்துவிட்டதாகவே பலரும் கருதுகின்றனர். ஆக்யான் போன்ற மதிப்புமிக்க நிறுவனங்களை கையகப்படுத்தியது முதல், அதன் பங்குகளை இழக்கும் அபாயம் வரை பல சிக்கல்களில் பைஜூஸ் சிக்கித் தவிக்கிறது.
ஊழியர்களின் வேலை நீக்கம் மற்றும் முதலீட்டாளர்களின் கடும் கோபம் என நிறுவனம் இன்று பல முனைகளில் போராடி வருகிறது. ரவீந்திரன் தன்னை நிரபராதி என்று கூறி சமரச பேச்சுவார்த்தையில் ஈடுபடுவதாக கூறினாலும், தற்போதைய சூழல் நிறுவனத்தின் எதிர்காலத்தை கேள்விக்குறியாக்கியுள்ளது. இந்தியாவின் ஸ்டார்ட்அப் கனவாக வளர்ந்த பைஜூஸ், முறையற்ற நிர்வாகத்தால் இன்று வீழ்ச்சியின் விளிம்பில் நிற்கிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
