'ஐஐடி' கட்-ஆஃப் பட்டியல் வெளியீடு! "ஜேஇஇ அட்வான்ஸ்டு தேர்வில் தேர்ச்சி பெற்றவர்கள் கவனத்திற்கு!"

ஐஐடி நுழைவுத் தேர்விற்கான 'ஜேஇஇ அட்வான்ஸ்டு 2026 தேர்வு' முடிவுகள் மற்றும் அதற்கான கட்-ஆஃப் மதிப்பெண்களை ஐஐடி ரூர்க்கி அதிகாரப்பூர்வமாக வெளியிட்டுள்ளது. ஐஐடி கல்வி நிறுவனங்களில் பி.டெக் உள்ளிட்ட இளங்கலை படிப்புகளில் சேருவதற்கு, மாணவர்கள் தேர்வில் தேர்ச்சி பெறுவதோடு, அந்தந்த பிரிவுகளுக்கான கட்-ஆஃப் மதிப்பெண்களையும் பெற்றிருக்க வேண்டும். தகுதி பெற்ற மாணவர்கள் அனைவரும் வரும் நாட்களில் நடைபெறவுள்ள ஜே.ஓ.எஸ்.ஏ.ஏ (JoSAA) கவுன்சிலிங் செயல்முறையில் பங்கேற்கத் தயாராகலாம்.

பொதுப்பிரிவு (CRL) மாணவர்களுக்கு, ஒவ்வொரு பாடத்திலும் குறைந்தபட்சம் 8 மதிப்பெண்களும், மொத்தம் 92 மதிப்பெண்களும் கட்டாயமாக்கப்பட்டுள்ளது. இது சதவீத அடிப்படையில் பார்த்தால், ஒவ்வொரு பாடத்திலும் 7.30 சதவீதமும், ஒட்டுமொத்தமாக 25.56 சதவீதமும் ஆகும். இதர பிற்படுத்தப்பட்டோர் (OBC-NCL) மற்றும் பொருளாதார ரீதியாகப் பின்தங்கிய பொதுப்பிரிவு (GEN-EWS) மாணவர்களுக்கு, பாடத்திற்கு 7 மதிப்பெண்களும், மொத்தம் 82 மதிப்பெண்களும் நிர்ணயிக்கப்பட்டுள்ளன.

பட்டியல் இனத்தவர் (SC) மற்றும் பழங்குடியினர் (ST) பிரிவினருக்கு, ஒவ்வொரு பாடத்திலும் 4 மதிப்பெண்களும், மொத்தம் 46 மதிப்பெண்களும் (சதவீத அடிப்படையில் 3.65% மற்றும் 12.78%) தேவை. மாற்றுத்திறனாளி மாணவர்களுக்கும் இதே மதிப்பெண் அளவுகோல் பின்பற்றப்படுகிறது. தயாரிப்புப் பிரிவினருக்கான (Preparatory Course) தகுதி மதிப்பெண், பாடத்திற்கு 2 மதிப்பெண்களும், மொத்தம் 23 மதிப்பெண்களும் என நிர்ணயிக்கப்பட்டுள்ளது.

தேர்வு எழுதிய மாணவர்கள் அனைவரும் ஐஐடியின் அதிகாரப்பூர்வ இணையதளத்தில் (jeeadv.ac.in) தங்களின் ரோல் நம்பர் மற்றும் பிறந்த தேதியைப் பயன்படுத்தி ஸ்கோர் கார்டைப் பதிவிறக்கம் செய்துகொள்ளலாம். கட்-ஆஃப் மதிப்பெண்களைத் தாண்டிய மாணவர்கள், தங்களின் தரவரிசைக்கு ஏற்பத் தகுதியான ஐஐடி கல்லூரிகள் மற்றும் பாடப்பிரிவுகளைத் தேர்வு செய்து ஜே.ஓ.எஸ்.ஏ.ஏ கவுன்சிலிங்கில் விண்ணப்பிக்கத் தயாராகுமாறு அறிவுறுத்தப்படுகிறார்கள். சேர்க்கைக்கான காலக்கெடு மற்றும் இதர முக்கியத் தகவல்களைத் தெரிந்துகொள்ள அதிகாரப்பூர்வ இணையதளத்தை அடிக்கடி சரிபார்ப்பது நல்லது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.