விமானப் பயணிகளுக்கு இனி குட் நியூஸ்! எரிபொருள் வரி அதிரடி குறைப்பு; "டிக்கெட் விலை குறையுமா?"

ஈரான் போர்ச் சூழல், ரூபாய் மதிப்பு வீழ்ச்சி மற்றும் அதிகரித்து வரும் செயல்பாட்டுச் செலவுகள் காரணமாக விமான எரிபொருள் விலை விண்ணைத் தொட்டுள்ள நிலையில், விமான நிறுவனங்களுக்குப் பெரும் நிம்மதி அளிக்கும் வகையில் டெல்லி மற்றும் மும்பை அரசுகள் வரி குறைப்பை அறிவித்துள்ளன. இந்தியாவின் இரண்டு மிகப்பெரிய விமான போக்குவரத்து மையங்களான இந்த நகரங்கள், விமான எரிபொருள் மீதான மதிப்புக்கூட்டு வரியை (VAT) கடுமையாகக் குறைத்துள்ளன. டெல்லி அரசு, எரிபொருள் மீதான வரியை 25 சதவீதத்திலிருந்து 7 சதவீதமாக ஆறு மாத காலத்திற்கு குறைத்துள்ளது. அதேபோல், மகாராஷ்டிரா அரசு மும்பையில் உள்நாட்டு விமானங்களுக்கான வரியை 18 சதவீதத்திலிருந்து 7 சதவீதமாகக் குறைத்துள்ளது.

இந்த வரி குறைப்பு குறித்து கருத்து தெரிவித்துள்ள துறை சார்ந்த நிபுணர்கள், இது விமான நிறுவனங்களின் பொருளாதாரத்தைச் சீரமைக்க உதவும் என்று கூறுகின்றனர். இந்தியாவின் மொத்த விமானப் பயணிகளில் பெரும்பகுதியினர் இந்த இரண்டு நகரங்களின் வழியாகவே பயணிக்கின்றனர். மேலும், நீண்ட தூரப் பயணங்கள் மற்றும் எரிபொருள் நிரப்பும் பணிகள் இங்குதான் அதிகம் நடக்கின்றன என்பதால், இந்த வரி குறைப்பு விமான நிறுவனங்களுக்குப் பெரிய சேமிப்பைத் தரும். எரிபொருள் விலை உயர்வால் தங்கள் வழித்தடங்களின் லாபம் பாதிக்கப்படுவதாக விமான நிறுவனங்கள் அரசுக்கு எச்சரிக்கை விடுத்திருந்த நிலையில், இந்த நடவடிக்கை எடுக்கப்பட்டுள்ளது.

இந்தத் தாக்குதல் மற்றும் அமெரிக்கா-ஈரான் மோதல் காரணமாக, உலகின் முக்கிய எரிசக்தி பாதையான ஹார்முஸ் ஜலசந்தியில் போக்குவரத்து பாதிக்கப்பட்டுள்ளது. உலகளாவிய எரிவாயு மற்றும் எண்ணெய் விநியோகத்தில் சுமார் 20 சதவீதம் இந்த வழியாகத்தான் செல்கிறது. இதனால் சர்வதேச சந்தையில் ஒரு பீப்பாய் எரிபொருளின் விலை பிப்ரவரி இறுதியில் 99.4 டாலராக இருந்தது, மே 8, 2026-ல் 162.89 டாலராக உயர்ந்துள்ளது. இந்தியாவின் மிக முக்கியமான விமான நிலையங்களான டெல்லி இந்திரா காந்தி மற்றும் மும்பை சத்ரபதி சிவாஜி சர்வதேச விமான நிலையங்கள் நாட்டின் விமான போக்குவரத்து கட்டமைப்பின் முதுகெலும்பாக உள்ளன. இங்கு தினசரி எரிபொருள் பயன்பாடு மிகப்பெரிய அளவில் இருப்பதால், இந்த வரி குறைப்பின் தாக்கம் மிகக் கணிசமானதாக இருக்கும்.

ஏற்கனவே விமான நிறுவனங்கள் விமான வாடகை, பராமரிப்புச் செலவுகள் மற்றும் ரூபாய் மதிப்பு சரிவால் கடுமையான நெருக்கடியில் உள்ளன. ஜிஎஸ்டி வரம்பிற்குள் விமான எரிபொருள் வராதது, மாநிலங்களுக்கு இடையே வரி விகிதங்கள் மாறுபடுவது போன்ற காரணங்களால் விமான நிறுவனங்கள் தொடர்ந்து புகார்களை எழுப்பி வருகின்றன. தமிழ்நாட்டில் இன்னும் எரிபொருள் மீது 29 சதவீத வரி வசூலிக்கப்படுவது குறிப்பிடத்தக்கது. வரி குறைப்பால் கிடைக்கும் இந்தச் சேமிப்பு, விமான நிறுவனங்கள் தங்கள் லாபத்தைப் பாதுகாத்துக்கொள்ள உதவும் என்றாலும், பயணிகள் உடனடியாகக் கட்டணக் குறைப்பை எதிர்பார்க்க முடியாது என்று கூறப்படுகிறது.

விமானப் பயணங்களுக்கான கட்டணம் என்பது எரிபொருள் விலையை விட, பயணிகளின் தேவை மற்றும் விமானங்களின் இருப்பைப் பொறுத்தே அமைகிறது. தற்போது விமானங்களின் பற்றாக்குறை மற்றும் உற்பத்தியில் உள்ள தாமதங்களால் விநியோகம் குறைவாக உள்ளது. இதனால், விமான நிறுவனங்கள் எரிபொருள் வரி குறைப்பு மூலம் கிடைக்கும் பணத்தைச் செலவுகளைச் சரிகட்டவே பயன்படுத்தும். டெல்லி மற்றும் மும்பை அரசுகள் இந்த வரி குறைப்பால் முறையே சுமார் 985 கோடி மற்றும் 600 கோடி ரூபாய் வருவாய் இழப்பைச் சந்திக்க வாய்ப்புள்ளது. இருப்பினும், ஒரு முக்கிய விமான போக்குவரத்து மையமாகத் திகழ இந்த முடிவை அவை எடுத்துள்ளன. நீண்ட கால அடிப்படையில் எரிபொருள் விலையை ஜிஎஸ்டி வரம்பிற்குள் கொண்டு வர வேண்டும் என்ற கோரிக்கையை விமான நிறுவனங்கள் தொடர்ந்து வலியுறுத்தி வருகின்றன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.