.png)
ரேஷன் கார்டில் குடும்ப உறுப்பினர்களின் பெயர்களைச் சேர்க்க வேண்டும், நீக்க வேண்டும் அல்லது முகவரியை மாற்ற வேண்டும் என்று நினைப்பவர்கள் இனி அதற்காக அலுவலகங்களுக்கு அலைய வேண்டியதில்லை. பொதுமக்களின் குறைகளை நேரடியாகக் கேட்டறிந்து தீர்வு காணும் வகையில், சென்னையில் உள்ள 19 மண்டலங்களிலும் வரும் நவம்பர் 14-ம் தேதி சிறப்பு மக்கள் குறைதீர் முகாம் நடைபெற உள்ளது. இந்த முகாமின் மூலம் குடும்ப அட்டைதாரர்கள் ரேஷன் கார்டு தொடர்பான பல்வேறு சேவைகளை ஒரே இடத்தில் பெற்றுக் கொள்ளலாம்.
தமிழ்நாடு முழுவதும் பொது விநியோகத் திட்டத்தின் கீழ் குடும்ப அட்டைதாரர்களுக்கு அத்தியாவசியப் பொருட்கள் முறையாகக் கிடைப்பதை உறுதி செய்யவும், ரேஷன் கடைகள் தொடர்பான புகார்களுக்குத் தீர்வு காணவும் உணவுப் பொருள் வழங்கல் மற்றும் நுகர்வோர் பாதுகாப்புத் துறை சார்பில் மாதந்தோறும் மக்கள் குறைதீர் முகாம்கள் நடத்தப்பட்டு வருகின்றன. அந்த வகையில், நவம்பர் மாதத்திற்கான முகாம் சென்னையில் உள்ள 19 மண்டல உதவி ஆணையர் அலுவலகங்களில் நடைபெறுகிறது.
முகாமில் என்னென்ன சேவைகள் கிடைக்கும்?
இந்த முகாமில் குடும்ப அட்டையில் புதிய உறுப்பினர்களின் பெயர்களைச் சேர்ப்பது தொடர்பாக விண்ணப்பிக்கலாம். திருமணத்திற்குப் பிறகு புதிதாகக் குடும்ப அட்டையில் பெயர் சேர்க்க வேண்டியவர்கள், குடும்பத்தில் புதிதாகப் பிறந்த குழந்தையின் பெயரைப் பதிவு செய்ய விரும்புபவர்கள் இந்தச் சேவையைப் பயன்படுத்திக் கொள்ளலாம். அதேபோல், குடும்ப அட்டையில் ஏற்கெனவே இடம்பெற்றுள்ள உறுப்பினர்களின் பெயர்களை நீக்குதல், குடும்ப அட்டையில் உள்ள முகவரியை மாற்றுதல், பதிவு செய்யப்பட்ட கைபேசி எண்ணை மாற்றுதல் அல்லது புதிய கைபேசி எண்ணைப் பதிவு செய்தல் போன்ற திருத்தங்களையும் மேற்கொள்ளலாம்.
இதுதவிர, நியாய விலைக் கடைகளில் பொருட்கள் சரியாக வழங்கப்படவில்லை, பொருட்களின் எடை குறைவாக உள்ளது, பொருட்கள் வழங்குவதில் தாமதம் ஏற்படுகிறது அல்லது கடை ஊழியர்களின் செயல்பாடுகளில் குறைபாடுகள் உள்ளன என்பது போன்ற புகார்களையும் பொதுமக்கள் நேரடியாகத் தெரிவிக்கலாம். தனியார் சந்தைகளில் விற்பனை செய்யப்படும் பொருட்கள் மற்றும் சேவைகள் தொடர்பான குறைகளையும் முகாமில் தெரிவிக்கலாம். பொதுமக்களிடமிருந்து பெறப்படும் புகார்கள் மீது உரிய நடவடிக்கை எடுத்து தீர்வு காணப்படும் எனத் தெரிவிக்கப்பட்டுள்ளது.
மூத்த குடிமக்களுக்கும் முக்கிய வசதி!
வயது முதிர்வு, உடல்நலக் குறைவு உள்ளிட்ட காரணங்களால் நியாய விலைக் கடைகளுக்கு நேரில் சென்று அத்தியாவசியப் பொருட்களைப் பெற முடியாத குடும்ப அட்டைதாரர்களுக்கும் இந்த முகாமில் உதவி கிடைக்கும். குறிப்பாக, அவர்களுக்குப் பதிலாக மற்றொரு நபர் ரேஷன் பொருட்களைப் பெற்றுக்கொள்ளத் தேவையான அங்கீகாரச் சான்று வழங்கப்படும்.
முகாமுக்குச் செல்பவர்கள் கவனத்திற்கு
முகாமில் மேற்கொள்ளப்படும் சேவைகளுக்கான சரிபார்ப்பு, குடும்ப அட்டையில் ஏற்கெனவே பதிவு செய்யப்பட்டுள்ள கைபேசி எண்ணுக்கு அனுப்பப்படும் ஒருமுறை கடவுச்சொல் (OTP) மூலமாக மேற்கொள்ளப்படும். எனவே, குடும்ப அட்டைதாரர்கள் தங்களது பதிவு செய்யப்பட்ட கைபேசியை உடன் எடுத்துச் செல்வது அவசியம். OTP சரிபார்ப்பு தேவைப்படுவதால், அந்த எண்ணைப் பயன்படுத்தும் கைபேசி முகாமின் போது உடன் இருப்பதை உறுதி செய்துகொள்ள வேண்டும்.
முகாம் நடைபெறும் நாள்: நவம்பர் 14, 2026 (சனிக்கிழமை)
நேரம்: காலை 10 மணி முதல் பிற்பகல் 1 மணி வரை.
இடம்: சென்னையில் உள்ள 19 மண்டல உணவுப் பொருள் வழங்கல் மற்றும் நுகர்வோர் பாதுகாப்புத் துறையின் உதவி ஆணையர் அலுவலகங்கள்.
கீழே கொடுக்கப்பட்டுள்ள முகவரிகள் 2025 ஆம் ஆண்டு அரசு பதிவுகளின் படி உறுதிசெய்யப்பட்டது. எனவே ஒரு முறை சரிபார்த்து கொள்ளவும்.
1. சிதம்பரனார் மண்டலம் (Chidambaranar Zone)
எண். 14, மூர் தெரு, கடற்கரை ரயில் நிலையம் அருகில், சென்னை – 600 001.
2. ராயபுரம் மண்டலம் (Royapuram Zone)
எண். 96, தொப்பை தெரு, ராயபுரம், சென்னை – 600 013.
3. பெரம்பூர் மண்டலம் (Perambur Zone)
எண். 29, பாரதி சாலை, வெள்ளையன் மார்க்கெட் அருகில், பெரம்பூர், சென்னை – 600 011.
4. அண்ணாநகர் மண்டலம் (Anna Nagar Zone)
எண். 116, ஈ.வெ.ரா. சாலை, புரசைவாக்கம், சென்னை – 600 084.
5. ஆர்.கே. நகர் மண்டலம் (R.K. Nagar Zone)
எச்.எல்.எல். சுனாமி குடியிருப்பு, டோண்டியார்பேட்டை, சென்னை – 600 081.
6. அம்பத்தூர் மண்டலம் (Ambattur Zone)
எண். 58, எம்.டி.எச். சாலை, வில்லிவாக்கம் நகராட்சி அலுவலக வளாகம், அம்பத்தூர், சென்னை – 600 053.
7. வில்லிவாக்கம் மண்டலம் (Villivakkam Zone)
புதிய எண். 60, பழைய எண். 109, பெருமாள் கோயில் தெரு, தெற்கு மாட வீதி, வில்லிவாக்கம், சென்னை – 600 049.
8. திருவொற்றியூர் மண்டலம் (Thiruvottiyur Zone)
எண். 936, திருவொற்றியூர் நெடுஞ்சாலை, நகராட்சி திருமண மண்டபம் அருகில், திருவொற்றியூர், சென்னை – 600 019.
9. ஆவடி மண்டலம் (Avadi Zone)
எண். 7, ஓ.சி.எஃப். சாலை, ஆவடி, சென்னை – 600 054.
10. தி.நகர் மண்டலம் (T. Nagar Zone)
எண். 5A, சாமியர்ஸ் சாலை, நந்தனம், சென்னை – 600 035.
11. மயிலாப்பூர் மண்டலம் (Mylapore Zone)
எண். 212, ஆர்.கே. மடம் சாலை, மயிலாப்பூர், சென்னை – 600 004.
12. புனித தோமையர் மலை மண்டலம் (St. Thomas Mount Zone)
எண். 3, ஏரிக்கரை தெரு, ஆதம்பாக்கம், சென்னை – 600 088.
13. தாம்பரம் மண்டலம் (Tambaram Zone)
ஜி.எஸ்.டி. சாலை, சானடோரியம் வட்டாட்சியர் அலுவலக வளாகம், சென்னை – 600 045.
14. சைதாப்பேட்டை மண்டலம் (Saidapet Zone)
எண். 29/13, பெரும்பட்டை முதல் தெரு, நந்தனம், சென்னை – 600 035.
15. ஆயிரம் விளக்கு மண்டலம் (Thousand Lights Zone)
எண். 1, வித்யோதயா பிரதான சாலை, தி.நகர், சென்னை – 600 035.
16. சேப்பாக்கம் மண்டலம் (Chepauk Zone)
பொதுப்பணித்துறை வளாகம், சேப்பாக்கம் ரயில் நிலையம் அருகில், சென்னை – 600 005.
17. சோழிங்கநல்லூர் மண்டலம் (Sholinganallur Zone)
எண். 147, நியூ குமரன் நகர் முதல் குறுக்குத் தெரு, சென்னை – 600 119.
18. மதுரவாயல் மண்டலம் (Maduravoyal Zone)
எண். 1/164, பூந்தமல்லி நெடுஞ்சாலை, வானகரம், சென்னை – 600 095.
19. கொளத்தூர் மண்டலம் (Kolathur Zone)
எண். 419/3A, 35-வது ஆசாத் தெரு, ஜி.கே.எம். காலனி, கொளத்தூர், சென்னை – 600 082.
எனவே, ரேஷன் கார்டில் பெயர் சேர்த்தல், பெயர் நீக்குதல், முகவரி மற்றும் கைபேசி எண் மாற்றம் உள்ளிட்ட திருத்தங்களைச் செய்ய வேண்டியவர்கள், தங்களது பகுதியில் நடைபெறும் இந்த முகாமைப் பயன்படுத்திக் கொள்ளலாம். மேலும், நியாய விலைக் கடைகள் தொடர்பான புகார்கள் மற்றும் பொது விநியோகத் திட்டத்தில் உள்ள குறைகளுக்குத் தீர்வு காண விரும்பும் பொதுமக்களும் இந்த வாய்ப்பைப் பயன்படுத்திக் கொள்ளுமாறு உணவுப் பொருள் வழங்கல் மற்றும் நுகர்வோர் பாதுகாப்புத் துறை கேட்டுக்கொண்டுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.