விரிவுபடுத்தப்பட்ட 'காலை உணவுத் திட்டம்' - சென்னையில் இன்று தொடங்கி வைக்கிறார் முதல்வர் விஜய்!

தமிழ்நாட்டில் அரசு மற்றும் அரசு உதவி பெறும் பள்ளிகளில் செயல்படுத்தப்பட்டு வரும் காலை உணவுத் திட்டம் தற்போது 6 முதல் 8ஆம் வகுப்பு வரை பயிலும் மாணவர்களுக்கும் விரிவுபடுத்தப்பட்டுள்ளது. ‘பெருந்தலைவர் காமராஜர் காலை உணவுத் திட்டம்’ என்ற பெயரில் செயல்படுத்தப்பட உள்ள இந்த விரிவாக்கத்தை முதலமைச்சர் ஜோசப் விஜய் இன்று சென்னை திருவான்மியூரில் உள்ள அரசு பள்ளியில் தொடங்கி வைக்கிறார்.

மாணவர்களின் ஊட்டச்சத்து நிலையை மேம்படுத்துதல், அவர்கள் பசியின்றி பள்ளிக்கு வருவதை உறுதி செய்தல், கல்வியில் முழுமையான கவனம் செலுத்த உதவுதல் உள்ளிட்ட நோக்கங்களுடன் தமிழ்நாட்டில் காலை உணவுத் திட்டம் செயல்படுத்தப்பட்டு வருகிறது. மேலும், பள்ளி மாணவர்களின் வருகையை அதிகரிப்பது மற்றும் இடைநிற்றலைக் குறைப்பது போன்ற நோக்கங்களும் இத்திட்டத்தின் பின்னணியில் உள்ளதாக அரசு தெரிவித்துள்ளது.

கடந்த 2022ஆம் ஆண்டு முதற்கட்டமாக 1 முதல் 5ஆம் வகுப்பு வரை பயிலும் மாணவர்களுக்காக இந்த காலை உணவுத் திட்டம் அறிமுகப்படுத்தப்பட்டது. பின்னர் அரசு உதவி பெறும் பள்ளிகளுக்கும் திட்டம் விரிவுபடுத்தப்பட்டது. தற்போது இதன் அடுத்தகட்டமாக 6 முதல் 8ஆம் வகுப்பு வரை பயிலும் மாணவர்களுக்கும் காலை உணவு வழங்க முடிவு செய்யப்பட்டுள்ளது. இந்த விரிவாக்கத்தின் மூலம் தமிழ்நாடு முழுவதும் 15,454 அரசு மற்றும் அரசு உதவி பெறும் பள்ளிகளில் பயிலும் சுமார் 15.30 லட்சம் மாணவ, மாணவிகள் கூடுதலாக பயன்பெற உள்ளனர். இதற்காக நடப்பு நிதியாண்டில் கூடுதலாக ரூ.217.63 கோடி நிதி ஒதுக்கப்பட்டுள்ளது. இதன் மூலம் காலை உணவுத் திட்டத்திற்கான மொத்த நிதி ஒதுக்கீடு ரூ.724 கோடியாக உயர்ந்துள்ளது.

சென்னையில் பெருநகர சென்னை மாநகராட்சியின் கீழ் உள்ள 447 அரசு மற்றும் அரசு உதவி பெறும் பள்ளிகளில் இந்த விரிவாக்கப்பட்ட திட்டம் செயல்படுத்தப்பட உள்ளது. இதற்காக ஒருங்கிணைந்த சமையல் கூடங்கள் மூலம் காலை உணவு தயாரித்து மாணவர்களுக்கு வழங்கப்படும். இதேபோல், பிற மாநகராட்சிகள், நகராட்சிகள் மற்றும் பேரூராட்சிப் பகுதிகளில் உள்ள பள்ளிகளிலும் ஒருங்கிணைந்த சமையல் கூடங்கள் மூலம் உணவு தயாரித்து வழங்க ஏற்பாடுகள் செய்யப்பட்டுள்ளன.

ஊரகப் பகுதிகளில் உள்ள பள்ளிகளில், அந்தந்த பள்ளிகளிலேயே காலை உணவு தயாரித்து வழங்கும் வகையில் ஏற்பாடுகள் செய்யப்பட்டுள்ளன. இதற்கான பணிகளில் தமிழ்நாடு மகளிர் மேம்பாட்டு நிறுவனம் மற்றும் சுய உதவிக் குழுக்களின் உறுப்பினர்கள் ஈடுபட உள்ளதாக தெரிவிக்கப்பட்டுள்ளது. திட்டத்தின் செயல்பாடுகள் முறையாக நடைபெறுவதை உறுதி செய்ய மாவட்ட அளவில் கண்காணிப்பு நடவடிக்கைகளும் மேற்கொள்ளப்பட உள்ளன. இதனிடையே, காலை உணவுத் திட்டத்திற்கு ‘பெருந்தலைவர் காமராஜர் காலை உணவுத் திட்டம்’ என பெயரிடப்பட்டுள்ளது. இதற்கு முன்பு இத்திட்டம் ‘முதல்வரின் காலை உணவுத் திட்டம்’ என்ற பெயரில் செயல்படுத்தப்பட்டு வந்தது. தற்போதைய அரசு இந்த திட்டத்தின் பெயரை மாற்றி, விரிவாக்க நடவடிக்கைகளை மேற்கொண்டுள்ளது.

முதலில் இந்த திட்ட விரிவாக்கத்தை செப்டம்பர் 17ஆம் தேதி தொடங்க திட்டமிடப்பட்டிருந்தது. ஆனால், முதலமைச்சர் விஜயின் வெளிநாட்டுப் பயணத்தைத் தொடர்ந்து தொடக்க விழா செப்டம்பர் 22ஆம் தேதிக்கு மாற்றப்பட்டது. இதன்படி இன்று திருவான்மியூரில் நடைபெறும் நிகழ்ச்சியில் முதலமைச்சர் விஜய் விரிவாக்கப்பட்ட திட்டத்தை தொடங்கி வைக்கிறார். எனினும், செங்கல்பட்டு மற்றும் திருப்பூர் மாவட்டங்களில் சட்டப்பேரவை இடைத்தேர்தலை முன்னிட்டு தேர்தல் நடத்தை விதிகள் அமலில் இருப்பதால், அங்கு மட்டும் செப்டம்பர் 22ஆம் தேதி இந்த திட்ட விரிவாக்கம் செயல்படுத்தப்படாது என அரசு தெரிவித்துள்ளது. இந்த இரண்டு மாவட்டங்களைத் தவிர்த்து, பிற மாவட்டங்களில் திட்டம் விரிவுபடுத்தப்பட உள்ளது.

மேலும், மாணவர்களுக்கு சூடான, சுவையான மற்றும் ஊட்டச்சத்து நிறைந்த உணவு வழங்கப்படுவதை உறுதி செய்ய வேண்டும் என்றும், சமையல் கூடங்கள் மற்றும் உணவு பரிமாறும் இடங்கள் சுத்தமாகவும் சுகாதாரமாகவும் பராமரிக்கப்பட வேண்டும் என்றும் அதிகாரிகளுக்கு முதலமைச்சர் விஜய் அறிவுறுத்தியுள்ளார். இதன் மூலம் ஏற்கனவே 1 முதல் 5ஆம் வகுப்பு மாணவர்களுக்கு வழங்கப்பட்டு வந்த காலை உணவுத் திட்டம், தற்போது 6 முதல் 8ஆம் வகுப்பு மாணவர்களுக்கும் சென்றடைய உள்ளது. இதனால் அரசு மற்றும் அரசு உதவி பெறும் பள்ளிகளில் பயிலும் மேலும் பல மாணவர்கள் காலை உணவுத் திட்டத்தின் கீழ் பயன்பெற உள்ளனர்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.