.png)
இந்தியாவின் தொழில்துறை மையங்களில் ஒன்றாகத் திகழும் நொய்டாவில் கடந்த சில நாட்களாக ஒரு மிகப்பெரிய தொழிலாளர் போராட்டம் வெடித்துள்ளது. ஆயிரக்கணக்கான தொழிலாளர்கள் வீதியில் இறங்கித் தங்களின் உரிமைகளுக்காகக் குரல் கொடுத்து வருவது ஒட்டுமொத்த நாட்டின் கவனத்தையும் ஈர்த்துள்ளது. தற்போதைய விலைவாசி உயர்வில் தங்களால் குடும்பத்தை நடத்தவே முடியவில்லை என்றும், வாங்கும் சம்பளம் வீட்டு வாடகைக்கும் உணவுக்குமே சரியாகப் போய்விடுகிறது என்றும் அவர்கள் கண்ணீருடன் தெரிவிக்கின்றனர். காலையில் முதல் மாலைய வரை ரத்தம் சிந்தி உழைத்தாலும், கையில் கிடைக்கும் சொற்ப ஊதியம் தங்களின் அடிப்படைத் தேவைகளைப் பூர்த்தி செய்யக் கூடப் போதுமானதாக இல்லை என்பதே இந்தப் போராட்டத்தின் மையக்கருவாக உள்ளது. குறிப்பாக, குறைந்தபட்ச ஊதியத்தை உயர்த்தி வழங்க வேண்டும் என்ற கோரிக்கை இப்போது வலுப்பெற்றுள்ளது.
இந்தப் போராட்டத்தில் ஈடுபட்டுள்ள தொழிலாளர்களின் முதன்மையான கோரிக்கை என்னவென்றால், ஒரு நாளைக்கு 8 மணிநேர வேலை மற்றும் குறைந்தபட்ச மாதச் சம்பளமாக 20,000 ரூபாய் வழங்கப்பட வேண்டும் என்பதுதான். தற்போது பல நிறுவனங்களில் தொழிலாளர்கள் 12 மணிநேரத்திற்கும் மேலாக வேலை வாங்கப்படுகிறார்கள், ஆனால் அவர்களுக்குக் கிடைக்கும் சம்பளம் வெறும் 10,000 முதல் 12,000 ரூபாய் வரை மட்டுமே உள்ளது. இவ்வளவு குறைவான வருமானத்தில் ஒரு குடும்பத்தைத் தலை நகருக்கு அருகிலுள்ள நொய்டா போன்ற விலையுயர்ந்த இடத்தில் நடத்துவது என்பது சாத்தியமற்ற ஒன்றாக உள்ளது. குழந்தைகளுக்கான கல்விச் செலவு, மருத்துவச் செலவு என அனைத்தையும் சமாளிக்க முடியாமல் தவிப்பதாகத் தொழிலாளர்கள் வேதனையுடன் கூறுகின்றனர். இது வெறும் சம்பள உயர்வுக்கான போராட்டம் மட்டுமல்ல, இது தங்களின் வாழ்வாதாரத்தைப் பாதுகாப்பதற்கான போராட்டம் என்று அவர்கள் முழக்கமிடுகின்றனர்.
நொய்டாவில் உள்ள செக்டார் 62 மற்றும் அதைச் சுற்றியுள்ள பகுதிகளில் நூற்றுக்கணக்கான தொழிற்சாலைகள் இயங்கி வருகின்றன. இங்கு வேலை செய்யும் தொழிலாளர்களில் பெரும்பாலானோர் பீகார், உத்தரப் பிரதேசம் மற்றும் பிற மாநிலங்களில் இருந்து குடிபெயர்ந்தவர்கள். இவர்களுக்கான தங்கும் வசதி மற்றும் உணவுச் செலவுகள் நாளுக்கு நாள் அதிகரித்து வருகின்றன. "நாங்கள் இயந்திரங்கள் அல்ல, நாங்களும் மனிதர்கள்தான்" என்று கூறித் தெருக்களில் அமர்ந்து அவர்கள் போராடி வருகின்றனர். அரசு நிர்ணயித்துள்ள குறைந்தபட்ச ஊதியத்தை விட மிகக் குறைவாகவே பல தனியார் நிறுவனங்கள் ஊதியம் வழங்குவதாகக் குற்றச்சாட்டுகள் எழுந்துள்ளன. தொழிலாளர் சட்டங்கள் முறையாகப் பின்பற்றப்படுவதில்லை என்றும், கேள்வி கேட்பவர்கள் வேலையை விட்டு நீக்கப்படுவார்கள் என்று மிரட்டப்படுவதாகவும் அவர்கள் குற்றம் சாட்டுகின்றனர்.
தொழிலாளர் சங்கங்களின் பிரதிநிதிகள் கூறுகையில், "நிறுவனங்கள் கோடிக்கணக்கில் லாபம் ஈட்டுகின்றன, ஆனால் அந்த லாபத்தை உருவாக்குவதற்கு முதுகெலும்பாக இருக்கும் தொழிலாளர்களுக்கு உரிய ஊதியம் கிடைப்பதில்லை" என்று தெரிவிக்கின்றனர். பணவீக்கம் மற்றும் அத்தியாவசியப் பொருட்களின் விலை உயர்வைக் கருத்தில் கொண்டு, ஊதியக் கட்டமைப்பில் மாற்றம் கொண்டு வரப்பட வேண்டும் என்று அவர்கள் வலியுறுத்துகின்றனர். 8 மணிநேர வேலை என்ற விதியை அமல்படுத்துவதன் மூலம் தொழிலாளர்களின் உடல் ஆரோக்கியம் மற்றும் குடும்ப நேரத்தைப் பாதுகாக்க முடியும் என்று அவர்கள் நம்புகிறார்கள். தற்போதைய நிலையில் அவர்கள் இடைவிடாது வேலை செய்வதால் மன அழுத்தம் மற்றும் உடல்நலப் பாதிப்புகளுக்கு உள்ளாகி வருவதாகவும், அதற்கான மருத்துவச் செலவுகளைக் கூட அவர்களால் சமாளிக்க முடிவதில்லை என்றும் கூறப்படுகிறது.
இந்தப் போராட்டத்தினால் நொய்டாவில் உள்ள பல தொழிற்சாலைகளின் உற்பத்திப் பணிகள் பாதிக்கப்பட்டுள்ளன. காவல்துறையினர் போராட்டக்காரர்களுடன் பேச்சுவார்த்தை நடத்தி வருகின்றனர், இருப்பினும் தங்களின் கோரிக்கைகள் நிறைவேறும் வரை பின்வாங்கப் போவதில்லை என்பதில் தொழிலாளர்கள் உறுதியாக உள்ளனர். அரசாங்கம் தலையிட்டுத் தொழிற்சாலை நிர்வாகங்களுக்கு முறையான உத்தரவுகளைப் பிறப்பிக்க வேண்டும் என்பது இவர்களின் கோரிக்கையாக உள்ளது. தொழிலாளர்களின் இந்தப் போராட்டம் சமூக வலைதளங்களிலும் வைரலாகி வருகிறது, பலரும் அவர்களுக்கு ஆதரவாகக் கருத்து தெரிவித்து வருகின்றனர். உழைப்புக்கு ஏற்ற ஊதியம் என்பது ஒவ்வொரு தொழிலாளியின் அடிப்படை உரிமை என்றும், அதை மறுப்பது மனித உரிமை மீறல் என்றும் சமூக ஆர்வலர்கள் சுட்டிக்காட்டுகின்றனர்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
