.png)
ஒரு நிறுவனம் எடுக்கும் ஒவ்வொரு முடிவும் அதன் மதிப்பை, அதன் தலைவரின் குணநலன்களை, அதன் கலாச்சாரத்தை வெளிப்படுத்தும். உலகின் மிகப் பெரிய உணவுப் பொருள் நிறுவனங்களில் ஒன்றான நெஸ்லே (Nestle), தனது தலைமை நிர்வாக அதிகாரியையே பணி நீக்கம் செய்தது, இதுபோன்ற ஒரு அரிதான நிகழ்வு. காரணம் - ஒரு ரகசிய காதல் விவகாரம்.
நெஸ்பிரெசோ காபி மற்றும் கிட்கேட் சாக்லேட் போன்ற உலகப் புகழ்பெற்ற பிராண்டுகளுக்குச் சொந்தக்காரரான நெஸ்லே, தனது தலைமை நிர்வாக அதிகாரியான லாரன்ட் ஃப்ரீக்ஸை உடனடியாகப் பதவி நீக்கம் செய்துள்ளது. இந்த அதிரடி முடிவுக்குக் காரணம், அவர் நிறுவன விதிகளுக்கு முரணாக, தனது கீழ்நிலை ஊழியர் ஒருவருடன் ரகசிய உறவு வைத்திருந்ததுதான். நிறுவனத்தின் வணிக நடத்தைக் கொள்கையை (Code of Business Conduct) அவர் மீறியதால், இந்த நடவடிக்கை எடுக்கப்பட்டதாக நெஸ்லே தெரிவித்துள்ளது.
அதிகாரப்பூர்வ அறிக்கை
நெஸ்லேவின் தலைவர் பால் புல்கே வெளியிட்டுள்ள அறிக்கையில், "இது ஒரு கடினமான, ஆனால் அவசியமான முடிவு. ஒரு நிறுவனத்தின் மதிப்பும், நிர்வாக ஒழுக்கமும் அதன் அடிப்படைத் தூண்கள். அதை நாம் ஒருபோதும் விட்டுக்கொடுக்க முடியாது" என்று உறுதியாகத் தெரிவித்தார்.
தலைமையின் திடீர் மாற்றம்
லாரன்ட் ஃப்ரீக்ஸ், கடந்த செப்டம்பர் 2024-இல் தான் தலைமை நிர்வாக அதிகாரியாகப் பதவி உயர்வு பெற்றார். வெறும் சில மாதங்களுக்குள், அவர் தனது பதவியை இழந்துள்ளார். லாரன்ட் ஃப்ரீக்ஸ், நெஸ்லேவில் 1986-ஆம் ஆண்டிலிருந்து பணியாற்றி வந்தவர். ஐரோப்பா மற்றும் லத்தீன் அமெரிக்காவில் பல்வேறு உயர் பதவிகளை வகித்து, நிறுவனத்தின் மூத்த நபர்களில் ஒருவராக இருந்தார்.
புதிய தலைவர்
ஃப்ரீக்ஸ் பதவி விலகியதைத் தொடர்ந்து, நெஸ்பிரெசோவின் தலைமை நிர்வாக அதிகாரியான பிலிப் நவரடில், உடனடியாக புதிய தலைமை நிர்வாக அதிகாரியாக நியமிக்கப்பட்டுள்ளார். நவரடில், 2001-ஆம் ஆண்டிலிருந்து நெஸ்லேவில் பணியாற்றி வருகிறார். நெஸ்லேவின் மூலோபாயப் பாதையில் மாற்றம் இல்லை என்றும், நிறுவனத்தின் வளர்ச்சியை அவர் மேலும் விரைவுபடுத்துவார் என்றும் நெஸ்லே நம்பிக்கை தெரிவித்துள்ளது.
லாரன்ட் ஃப்ரீக்ஸின் பதவி விலகலுக்கு, அவரது தனிப்பட்ட விவகாரமே காரணம் என்று கூறப்பட்டாலும், நெஸ்லே நிறுவனம் கடந்த ஆண்டு எதிர்கொண்ட பொருளாதாரச் சவால்களும் கவனிக்கப்பட வேண்டியவை. சீனாவில் ஏற்பட்ட மந்தமான நுகர்வோர் செலவினங்கள் மற்றும் கோகோ மற்றும் காபி விலைகள் அதிகரித்ததால், நெஸ்லேவின் பங்கு விலை சரிந்தது. 2024-இன் முதல் அரையாண்டில், நிறுவனத்தின் லாபம் 10.3% குறைந்திருந்தது குறிப்பிடத்தக்கது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
