.png)
துபாய்: வளர்ந்து வரும் அதிநவீன தொழில்நுட்ப உலகில் செயற்கை நுண்ணறிவு எனப்படும் (AI) ஒரு புரட்சிகரமான சக்தியாக உருவெடுத்துள்ளது. ஒவ்வொரு நாளும் புதுமையான கண்டுபிடிப்புகள் இந்தத் தொழில்நுட்பத்தின் மூலம் வெளிவந்து உலகை வியப்பில் ஆழ்த்தி வருகின்றன.
அந்த வரிசையில், ஐக்கிய அரபு அமீரகத்தைச் சேர்ந்த ஒரு AI ஸ்டார்ட்அப் நிறுவனம் தனது அசாதாரணமான கண்டுபிடிப்பின் மூலம் உலக வணிகச் சந்தையின் கவனத்தை வெகுவாக ஈர்த்துள்ளது. அந்த நிறுவனம், வெறும் AI ஏஜென்ட்களைக் கொண்டே 100 ஊழியர்கள் செய்யக்கூடிய வேலையை செய்து முடிக்க முடியும் என்று அதிரடியாக அறிவித்துள்ளது.
CozmoX என்ற அந்த ஸ்டார்ட்அப் நிறுவனத்தின் இணை நிறுவனரான நுஹா ஹாஷேம் அவர்கள், பிரபல துபாய் பத்திரிகையான கலீஜ் டைம்ஸுக்கு அளித்த பேட்டியில் இந்தத் தகவலை வெளியிட்டுள்ளார். அவர் மேலும் கூறுகையில், அதிநவீன AI ஏஜென்ட்களால் ஒரு நிறுவனத்தின் 100 ஊழியர்கள் இணைந்து செய்யும் வேலையை மிக எளிதாக செய்து முடிக்க முடியும்.
இதன் மூலம் மனித வளத்தை மிகவும் முக்கியமான மற்றும் சிக்கலான பணிகளில் முழுமையாக கவனம் செலுத்த வைக்க முடியும் என்று நம்பிக்கை தெரிவித்தார். நுஹா ஹாஷேமின் இந்த கருத்து வணிக உலகத்தில் பெரும் ஆச்சரியத்தையும், ஆர்வத்தையும் தூண்டியுள்ளது.
கடந்த பத்து ஆண்டுகளில் தாங்கள் சேகரித்திருக்கும் அளவிலான தரவுகளைப் பயன்படுத்தி, ஒரே ஒரு நாளுக்குள் செயற்கை நுண்ணறிவு தொழில்நுட்பத்தால் இயங்கக்கூடிய அதிநவீன AI ஏஜென்ட்களை உருவாக்க முடியும் என்று நுஹா ஹாஷேம் மேலும் தெரிவித்தார். இந்த AI ஏஜென்ட்களின் உற்பத்தி திறன், ஒரு நிறுவனத்தின் 100 மனித ஊழியர்களுக்கு சமமாக இருக்கும் என்பது அவரது உறுதியான கருத்தாகும்.
இதற்கு உதாரணமாக, ஒரு பெரிய நிறுவனத்தில் ஒரு நாளைக்கு சுமார் 10,000 வாடிக்கையாளர் அழைப்புகளை மேற்கொள்ள வேண்டிய தேவை இருப்பதாக வைத்துக்கொள்வோம். இதற்கு அந்த நிறுவனங்கள் ஆயிரக்கணக்கான ஊழியர்களை பணியமர்த்த வேண்டியிருக்கும். ஆனால், CozmoX நிறுவனத்தின் அதிநவீன AI ஏஜென்ட் இந்த அனைத்து பணிகளையும் தனி ஒருவனாகவே செய்து முடிக்கும் திறன் படைத்தது என்று நுஹா ஹாஷேம் விளக்கினார். தற்போது இந்தத் தொழில்நுட்பத்தை பொதுத்துறை நிறுவனங்களுடன் இணைந்து வெற்றிகரமாக செயல்படுத்தி வருவதாகவும் அவர் குறிப்பிட்டார்.
இந்த கண்டுபிடிப்பில் மிகவும் சுவாரஸ்யமான விஷயம் என்னவென்றால், இந்த CozmoX நிறுவனத்தின் தலைமை நிர்வாக அதிகாரி (CEO) ஒரு இந்தியர். இந்தியாவில் பிறந்து ஐக்கிய அரபு அமீரகத்தில் வசித்து வரும் அலோக் குமார் தான் இந்த நிறுவனத்தை திறம்பட வழிநடத்தி வருகிறார். மேலும், மத்திய கிழக்கு நாடுகளில் வசிக்கும் 30 வயதுக்குட்பட்ட இளம் சாதனையாளர்களின் பட்டியலில் அலோக் குமாரும் இடம்பெற்றுள்ளார் என்பது குறிப்பிடத்தக்கது.
எதிர்காலத்தில் AI ஏஜென்ட்கள் வணிக உலகில் மிகவும் சாதாரணமாக பயன்படுத்தப்படும் ஒரு விஷயமாக மாறிவிடுவார்கள் என்று அலோக் குமார் நம்பிக்கை தெரிவித்தார். ஏற்கனவே CozmoX நிறுவனத்தால் உருவாக்கப்பட்ட AI ஏஜென்ட்கள் பல நிறுவனங்களுக்கு மாதந்தோறும் நூற்றுக்கணக்கான டாலர்களைச் சேமிக்க உதவி வருகின்றன. சில சமயங்களில், ஒரு நிறுவனம் மாதம் 1 லட்சம் டாலர் வரை (இந்திய மதிப்பில் சுமார் 85 லட்சம் ரூபாய்) சேமிக்கிறது என்று அவர் கூறினார்.
பொதுத்துறை நிறுவனங்கள் மட்டுமின்றி, தனியார் துறை நிறுவனங்களும் தங்களது விற்பனை (சேல்ஸ்), வாடிக்கையாளர் சேவை (கஸ்டமர் சப்போர்ட்) போன்ற அனைத்து விதமான பணிகளையும் இந்த AI ஏஜென்ட்களைக் கொண்டே திறம்பட செய்து முடிக்க முடியும் என்றும் அலோக் குமார் தெரிவித்தார்.
AI ஏஜென்ட்களால் மனிதர்களின் வேலை வாய்ப்புகள் குறையுமா என்ற கேள்விக்கு பதிலளித்த அலோக் குமார், ஐக்கிய அரபு அமீரகத்தில் தற்போது 50-க்கும் மேற்பட்ட நிறுவனங்கள் CozmoX நிறுவனத்துடன் இணைந்து வாடிக்கையாளர் சேவை மற்றும் கடன் வசூல் செய்வது போன்ற பல்வேறு பணிகளை மேற்கொண்டு வருவதாகக் கூறினார். இந்த AI ஏஜென்ட்கள் 80-க்கும் மேற்பட்ட மொழிகளில் சரளமாக உரையாடும் திறன் கொண்டவை. மேலும், இந்தத் தொழில்நுட்பத்தின் மூலம் ஒவ்வொரு நிறுவனத்திற்கும் ஆயிரக்கணக்கான மணி நேரங்கள் மிச்சப்படுத்தப்படுவதோடு மட்டுமல்லாமல், மில்லியன் கணக்கான டாலர்களும் சேமிக்கப்படுகின்றன.
ஒரே ஒரு AI ஏஜென்ட் மூலம் ஒரு நிறுவனத்தின் பல்வேறு வேலைகளை சில நிமிடங்களிலேயே செய்து முடிக்க முடியும் என்பதால், மனித ஊழியர்கள் தங்களது நேரத்தையும் கவனத்தையும் மிகவும் முக்கியமான பிற பணிகளில் செலுத்த முடியும். இதன் விளைவாக, ஒவ்வொரு ஊழியரின் உற்பத்தி திறனும் கணிசமாக அதிகரிக்கும் என்று அலோக் குமார் தனது கருத்தை வெளிப்படுத்தினார்.
CozmoX நிறுவனத்தின் இந்த அதிரடியான கண்டுபிடிப்பு, செயற்கை நுண்ணறிவின் அபரிமிதமான ஆற்றலையும், அது வணிக உலகத்தில் ஏற்படுத்தப்போகும் பாரிய மாற்றங்களையும் நமக்கு உணர்த்துகிறது. மனித உழைப்பிற்கு மாற்றாக AI வருமா அல்லது மனிதர்களுடன் இணைந்து புதிய உற்பத்தி புரட்சியை ஏற்படுத்துமா என்பதை பொறுத்திருந்து தான் பார்க்க வேண்டும். ஆனால், CozmoX போன்ற நிறுவனங்களின் புதுமையான முயற்சிகள் தொழில்நுட்ப உலகில் ஒரு புதிய அத்தியாயத்தை தொடங்கி இருப்பது மட்டும் நிதர்சனம்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
