இடைத்தேர்தல் காய்ச்சலில் கூட்டணி தலைவர்கள்.. ரிசல்ட் வந்ததும் மாறப்போகும் களம்? நிலைத்திருக்குமா மசவெகூ?

தமிழகத்தில் நாளை வெளியாக உள்ள தாராபுரம் மற்றும் மதுராந்தகம் தொகுதிகளின் இடைத்தேர்தல் முடிவுகள், அனைத்து அரசியல் கட்சிகளின் கவனத்தையும் ஈர்த்துள்ளன. பொதுவாக இடைத்தேர்தல் என்றாலே ஆளும் கட்சிக்கு சாதகமாக இருக்கும் என்ற கருத்து உள்ளது. ஆனால் இந்த இடைத்தேர்தல் பல்வேறு காரணங்களால் முக்கியத்துவம் பெற்றுள்ளது. குறிப்பாக, 5 முனை போட்டி, தவெகவுக்கு ஆதரவு அளித்து வந்த கம்யூனிஸ்ட் கட்சிகள் தனித்து போட்டியிடுவது, அதிமுகவில் இருந்து விலகி தவெகவில் இணைந்த முன்னாள் எம்.எல்.ஏ.க்கள் மீண்டும் அதே தொகுதியில் போட்டியிடுவது என, இந்த தேர்தல் பல அரசியல் கணக்குகளுக்கு விடை சொல்லப்போகிறது. அதிலும் முக்கியமாக, தவெக தலைமையில் உருவான மதசார்பற்ற சமூகநீதி வெற்றிக்கூட்டணி தேர்தல் முடிவுக்கு பிறகு அதே வேகத்தில் தொடருமா? என்ற கேள்வியும் எழுந்துள்ளது.

அக்டோபர் 6-ஆம் தேதி நடைபெற்ற வாக்குப்பதிவில் மதுராந்தகத்தில் 86 சதவீதத்துக்கும் அதிகமாகவும், தாராபுரத்தில் 80 சதவீதத்துக்கும் அதிகமாகவும் வாக்குகள் பதிவாகியுள்ளன. இரு தொகுதிகளிலும் நாளை காலை 8 மணிக்கு வாக்கு எண்ணிக்கை தொடங்குகிறது.

இந்த இடைத்தேர்தலின் மிக முக்கிய அம்சம், ஏற்கனவே 2026 சட்டமன்றத் தேர்தலில் அதிமுக சார்பில் வெற்றி பெற்ற மரகதம் குமரவேல் மற்றும் சத்யபாமா ஆகிய இருவரும் தங்களது பதவிகளை ராஜினாமா செய்து தவெகவில் இணைந்த பின்னர், அதே தொகுதிகளில் மீண்டும் தவெக வேட்பாளர்களாக களம் இறங்கியிருப்பதுதான். எனவே இது வெறும் இடைத்தேர்தல் அல்ல; இரு வேட்பாளர்களுக்கும் மறுமுறை மக்கள் தீர்ப்பை கேட்கும் தேர்தலாகவும் பார்க்கப்படுகிறது.

இரு தொகுதியிலும் தவெக வெற்றி பெற்றால்?

மதுராந்தகத்தில் மரகதம் குமரவேலும், தாராபுரத்தில் சத்யபாமாவும் வெற்றி பெற்றால், அது தவெகவுக்கு மிகப்பெரிய அரசியல் பலமாக அமையும். காரணம், இருவரும் ஏற்கனவே அதிமுக சார்பில் எம்.எல்.ஏ.க்களாக இருந்தவர்கள். பதவியை ராஜினாமா செய்துவிட்டு தவெகவில் இணைந்து, மீண்டும் அதே தொகுதியில் மக்களை சந்தித்துள்ளனர். எனவே, இருவரும் வெற்றி பெற்றால், “ராஜினாமா செய்த இவர்களுக்கு மக்கள் மீண்டும் ஆதரவு கொடுத்திருக்கிறார்கள்” என்ற செய்தி கிடைக்கும். அதேபோல், “விஜய் அலை இன்னும் குறையவில்லை” என்ற அரசியல் விவாதத்துக்கும் இது வலு சேர்க்கும்.

ஆனால், இங்குதான் கூட்டணி அரசியலில் அடுத்த கட்ட பிரச்சனை ஆரம்பிக்கலாம். இரண்டு தொகுதிகளிலும் தவெக வெற்றி பெற்று மேலும் இரண்டு எம்.எல்.ஏ.க்கள் கிடைத்தால், தவெகவின் சட்டமன்ற பலம் அதிகரிக்கும். இதனால், தேர்தலுக்கு முன்பு கூட்டணி கட்சிகளின் ஆதரவு எவ்வளவு முக்கியமாக இருந்ததோ, அதே அளவு அவசியம் இருக்கிறதா என்ற கேள்வி எழலாம். குறிப்பாக, கம்யூனிஸ்ட் கட்சிகள் வெளியில் இருந்து ஆதரவு அளித்தாலும், அமைச்சரவையில் இடம்பெறவில்லை. அதேபோல், தவெக தலைமையில் உருவான மதசார்பற்ற சமூகநீதி வெற்றிக்கூட்டணி என்ற அரசியல் கட்டமைப்பிலும் அவற்றின் இடம் எப்படி தொடரும் என்பது முக்கியமான கேள்வியாக மாறலாம்.

அதனால் இரண்டு இடங்களிலும் வெற்றி கிடைத்தால், கம்யூனிஸ்ட் கட்சிகளின் ஆதரவு தேவையில்லை என்று தவெக நேரடியாக முடிவு செய்யும் என்று சொல்ல முடியாவிட்டாலும், அவர்களுடன் பேரம் பேசும் தவெகவின் அரசியல் நிலை நிச்சயம் மாறக்கூடும்.

அடுத்த சிக்கல் விசிகவுக்கா?

இங்குதான் விடுதலை சிறுத்தைகள் கட்சியின் நிலை முக்கியத்துவம் பெறுகிறது. விசிகவிடம் தற்போது குறைந்த எண்ணிக்கையிலான எம்.எல்.ஏ.க்கள் மட்டுமே உள்ள நிலையில், கூட்டணி அரசியலில் அந்தக் கட்சியின் பங்கு முக்கியமானது. அதேநேரத்தில், பாமக கூட்டணிக்குள் வந்தால் விசிக வெளியேறும் என்ற நிலைப்பாட்டை திருமாவளவன் ஏற்கனவே வெளிப்படுத்தியிருக்கிறார்.

எனவே, எதிர்காலத்தில் பாமகவை கூட்டணிக்குள் கொண்டு வர தவெக முயற்சி செய்தால், அது விசிகவின் நிலைப்பாட்டுடன் நேரடியாக மோதக்கூடிய ஒரு அரசியல் கணக்காக மாறலாம். பாமகவிடம் 5 எம்.எல்.ஏ.க்கள் இருப்பதும், வன்னியர் வாக்கு வங்கியில் அந்தக் கட்சியின் தாக்கமும் தவெகவால் கணக்கில் எடுத்துக்கொள்ளப்படக்கூடியவை.

அடுத்தடுத்த இடைத்தேர்தல்களில் வன்னியர் வாக்குகளை அதிக அளவில் தவெகவுக்கு கொண்டு வர வேண்டும் என்ற அரசியல் கணக்கு உருவானால், பாமகவை கூட்டணிக்குள் கொண்டுவருவது குறித்து தவெகவின் இரண்டாம் கட்ட தலைவர்கள் பரிசீலிக்கலாம்.

அப்படி நடந்தால், “பாமக வேண்டுமா? விசிக வேண்டுமா?” என்ற புதிய கூட்டணி கணக்கு உருவாகும் வாய்ப்பும் உள்ளது.

ஒரு தொகுதியில் தவெக தோற்றால்?

தவெக ஒரு தொகுதியில் வெற்றி பெற்று மற்றொரு தொகுதியில் தோற்றால், உடனடியாக கூட்டணி அரசியலில் மிகப்பெரிய மாற்றம் ஏற்படும் என்று கூற முடியாது. ஆனால் கட்சிக்குள் நிர்வாகிகள் மீதான அழுத்தம் அதிகரிக்கலாம். குறிப்பாக அடுத்தடுத்த இடைத்தேர்தல்களில் தீவிரமாக பணியாற்ற வேண்டும் என்ற நெருக்கடி உருவாகலாம். அதேபோல், சமீபத்தில் அதிமுகவில் இருந்து விலகி தவெகவில் இணைந்த விஜயபாஸ்கர் போன்ற தலைவர்களுக்கு அடுத்தடுத்த தேர்தல்களில் சீட் வழங்கப்படுமா என்ற கேள்வியும் எழலாம்.

கூட்டணி ரீதியாக பார்க்கும்போது, வெளியில் இருந்து ஆதரவு அளிக்கும் கம்யூனிஸ்ட் கட்சிகளின் முக்கியத்துவமும் தொடரும். அவர்களின் ஆதரவு தேவைப்படும் நிலையில், அவர்களின் கோரிக்கைகளை தவெக பரிசீலிக்க வேண்டிய கட்டாயமும் நீடிக்கும். அதேபோல் விசிக, IUML உள்ளிட்ட கூட்டணி கட்சிகளின் ஆதரவும் தொடர்ந்து முக்கியமானதாக இருக்கும்.

இரு தொகுதியிலும் தவெக தோல்வியடைந்தால்?

இதுதான் தவெகவுக்கு மிகப்பெரிய அரசியல் சவாலாக மாறலாம். இரண்டு தொகுதிகளிலும் தவெக தோல்வியடைந்தால், அடுத்தடுத்த இடைத்தேர்தல்களில் வாக்கு வங்கியை விரிவுபடுத்த கூட்டணி அரசியலை இன்னும் தீவிரமாக அணுக வேண்டிய சூழல் உருவாகலாம். குறிப்பாக, வன்னியர் வாக்குகளைப் பெற பாமக ஆதரவு தேவையா என்ற கணக்கு முக்கியமாகலாம்.

இந்த இடைத்தேர்தலில் பாமக எந்த அணிக்கும் ஆதரவு அளிக்கவில்லை என்ற முடிவும், அதற்குப் பின்னால் அரசியல் காரணங்கள் இருக்கலாம் என்ற விவாதமும் ஏற்கனவே எழுந்துள்ள நிலையில், தேர்தல் முடிவு பாமகவை நோக்கிய தவெகவின் அரசியல் அணுகுமுறையை மாற்றுமா என்பதும் கவனிக்க வேண்டிய ஒன்று.

அதேநேரத்தில், பாமக கூட்டணிக்கு வரவில்லை என்றாலும், அடுத்தடுத்த இடைத்தேர்தல்களில் தவெகவுக்கு எதிராக தங்கள் வாக்கு வங்கியை நிரூபிக்க வேண்டிய அழுத்தம் விசிகவுக்கும் ஏற்படலாம். குறிப்பாக, தலித் வாக்கு வங்கியை தங்களால் எந்த அளவுக்கு ஒருங்கிணைக்க முடியும் என்பதை நிரூபிக்க வேண்டிய சூழல் உருவாகலாம்.

திமுக, அதிமுகவுக்கும் இது முக்கியமான தேர்தல்

இந்த தேர்தல் தவெகவுக்கு மட்டும் சோதனை அல்ல. திமுகவைப் பொறுத்தவரை, ஆளும் கட்சியான தவெகவுக்கு எதிராக தனது வாக்கு வங்கியை நிரூபிக்க வேண்டிய தேர்தல் இது. அதிமுகவைப் பொறுத்தவரை, தங்களிடம் இருந்த இரண்டு தொகுதிகளில் இருந்து முன்னாள் எம்.எல்.ஏ.க்கள் தவெகவுக்கு சென்றுள்ள நிலையில், அந்த தொகுதிகளில் தங்களுடைய பாரம்பரிய வாக்குகள் எவ்வளவு அளவுக்கு தங்களுடன் இருக்கின்றன என்பதை நிரூபிக்க வேண்டிய நிலை உள்ளது. அதனால், ஒரு தொகுதி வெற்றி என்றாலும் திமுக, அதிமுக ஆகிய இரு கட்சிகளுக்கும் அரசியல் ரீதியாக முக்கியமானதாக இருக்கும்.

இடைத்தேர்தலில் ஆளும் கட்சியை வீழ்த்த முடியாதா?

இடைத்தேர்தல் என்றாலே ஆளும் கட்சிக்குத்தான் சாதகம் என்ற பொதுவான கருத்து இருந்தாலும், தமிழக அரசியலில் அதற்கு விதிவிலக்குகள் உள்ளன. கடந்த காலங்களில் ஆளும் கட்சிகளை எதிர்க்கட்சிகளும், ஆளும் அணிக்கு வெளியே இருந்த வேட்பாளர்களும் வீழ்த்தியுள்ள சம்பவங்கள் உள்ளன. 1991, 1999, 2004 , 2017 மற்றும் 2019 இடைத்தேர்தல்களில் ஆளும் கட்சியை தோற்கடித்து எதிர்கட்சி வெற்றி பெற்றுள்ளது குறிப்பிடத்தக்கது.

நாளைய முடிவு சொல்லப்போகும் அரசியல் செய்தி என்ன?

இறுதியில், மதுராந்தகம் மற்றும் தாராபுரம் ஆகிய இரண்டு தொகுதிகளின் முடிவு, வெறும் இரண்டு எம்.எல்.ஏ.க்களை தேர்வு செய்வதோடு முடிந்துவிடுமா என்பதுதான் கேள்வி. இரண்டு தொகுதிகளிலும் தவெக வென்றால் "விஜய் அலை" தொடர்கிறது என்ற செய்தி வலுப்பெறலாம்.

ஒரு தொகுதியில் மட்டும் வென்றால் "எச்சரிக்கை மணியாக" இருக்கலாம்.

இரண்டு தொகுதிகளிலும் தோற்றால் "கூட்டணி அரசியலை மறுபரிசீலனை" செய்ய வேண்டிய கட்டாயம் உருவாகலாம்.

அதிலும் குறிப்பாக, பாமகவை நோக்கிய தவெகவின் பார்வை, விசிகவின் எதிர்கால நிலைப்பாடு, கம்யூனிஸ்ட் கட்சிகளின் ஆதரவின் அவசியம் ஆகியவை தேர்தல் முடிவுக்குப் பிறகு மீண்டும் அரசியல் விவாதமாக மாறலாம். எனவே, நாளை வெளியாகப்போகும் முடிவு இரண்டு தொகுதிகளின் ரிசல்ட் மட்டுமல்ல. தவெக தலைமையிலான கூட்டணி அப்படியே தொடருமா? கூட்டணிக்குள் கட்சிகளின் முக்கியத்துவம் மாறுமா?
பாமகவுக்கு கதவு திறக்கப்படுமா? விசிகவின் நிலை என்னவாகும்? என்ற அடுத்தகட்ட தமிழக அரசியல் கேள்விகளுக்கும் முதல் பதிலை கொடுக்கப்போகும் முடிவாக இது அமையலாம்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்