ஆம்னி பேருந்துகளில் அதிக கட்டணம் வசூலித்தால் சட்டப்படி நடவடிக்கை எடுக்கப்படும் என போக்குவரத்து துறை அமைச்சர் சிவசங்கர் தெரிவித்தார்.

அரியலூர் மாவட்டம் கீழப்பழுவூரில் மொழிப்போர் தியாகி கீழப்பழுவூர் சின்னசாமி திருவுருவ சிலையுடன் கூடிய நினைவு அரங்கம் அமைக்கும் பணியை போக்குவரத்து துறை அமைச்சர் சிவசங்கர் தொடங்கி வைத்தார்.

3 கோடி மதிப்பில் அமைக்கப்பட இருக்கும் நினைவு அரங்கில் மொழிப்போர் தியாகி சின்னசாமியின்  புகைப்படங்கள் காட்சிப்படுத்தப்பட உள்ளன.

இதனையடுத்து செய்தியாளர்களை சந்தித்த  தமிழ்நாடு போக்குவரத்து துறை அமைச்சர் சிவசங்கர் :-

"எப்போதும் இல்லாத அளவிற்கு விழாக் காலங்களில் அதிகளவில் சிறப்பு பேருந்துகள் இயக்கப்பட்டு வருகிறது. மேலும் வரக்கூடிய தீபாவளி பண்டிகை ஒட்டியும் சிறப்பு பேருந்துகள் இயக்கப்படுகிறது. 

அரசு விரைவு போக்குவரத்து கழகத்தில் பயணம் செய்ய முன்பதிவு செய்யும் பயணிகளின் எண்ணிக்கையை பொறுத்து கூடுதல் பேருந்துகளை இயக்க நடவடிக்கை எடுக்கப்படும்.

கடந்த ஆண்டை விட இவ்வாண்டு ஆம்னி பேருந்துகளில்  ஐந்து சதவீத கட்டணத்தை குறைப்பதாக ஆம்னி பேருந்து உரிமையாளர்கள் தெரிவித்துள்ளனர்.  இதனை மீறி அதிக கட்டணம் வசூலிக்கும் ஆம்னி பேருந்துகள் மீது சட்டப்படி நடவடிக்கை எடுக்கப்படும் விழா காலங்களில் பொதுமக்கள் அவரவர் வீடுகளுக்கு செல்வதற்கு தமிழ்நாடு போக்குவரத்து துறை போதுமான அளவு பேருந்துகளை இயக்க நடவடிக்கை எடுத்து வருவதாக கூறினார்.

இதையும் படிக்க   | "பாஜகவின் ஓர் அணிதான் வருமான வரித்துறை" - உதயநிதி ஸ்டாலின்

தமிழ்நாட்டில் வருகிற 5-ம் தேதி நியாய விலைக் கடைகள் இயங்கும் என தமிழ்நாடு அரசு அறிவித்துள்ளது. 

இந்த மாதம் 12ஆம் தேதி தீபாவளி பண்டிகை கொண்டாடப்பட உள்ள நிலையில் வரும் ஐந்தாம் தேதி ஞாயிற்றுக்கிழமை அன்று நியாய விலை கடைகளுக்கு விடுமுறை இல்லை என அறிவிப்பு வெளியாகியுள்ளது.

அனைத்து நாட்களிலும் அனைத்து அட்டைதாரர்களுக்கும் அனைத்து பொருட்களையும் வழங்க வேண்டும் என ரேஷன் கடை பணியாளர்களுக்கு உணவுத்துறை அறிவித்துள்ளது. 

தீபாவளி பண்டிகைக்கு பல்வேறு குடும்பத்தினர் முன்கூட்டியே அரிசி சர்க்கரை பருப்பு உள்ளிட்ட பொருட்களை வாங்குவார்கள் என்பதால் இருப்பு சரியான முறையில் வைத்துக் கொள்ள வேண்டும் எனவும் அறிவுறுத்தப்படுகிறது.   

இதையும் படிக்க  |  வணிக பயன்பாட்டுக்கான சிலிண்டர் விலை உயர்வு!

ஆம்னி பேருந்துக்களில் அதிக கட்டணம் வசூலிக்கப்படுவதால் தொடர் விடுமுறை முடிந்து சென்னை திரும்பும் பொதுமக்கள் கடும் அவதி அடைந்துள்ளனர்.

தொடர் விடுமுறையை ஒட்டி சொந்த ஊருக்கு சென்ற பொதுமக்கள், விடுமுறை முடிந்து சென்னை திரும்பும் நிலையில், ஆம்னி பேருந்துக்களில் அதிக கட்டணம் வசூலிக்கப்பட்டதால் அவதி அடைந்தனர்.

சென்னை, பெங்களூரு செல்ல பொதுமக்கள் நெல்லை புதிய பேருந்து நிலையத்தில் குவிந்ததால் கடும் நெரிசல் ஏற்பட்டது. பொதுமக்களின் வருகையை அறிந்த ஆம்னி பேருந்து உரிமையாளர்கள் கட்டணத்தை இரு மடங்கு உயர்த்தியதால் பொதுமக்கள், அரசு பேருந்தை நோக்கி படையெடுத்தனர்.

அதே போல், மதுரையில் இருந்து சென்னை செல்லும் தனியார் ஆம்னி பேருந்துகளில் இரண்டு மடங்கு கூடுதல் கட்டணம் வசூலிக்கப்பட்டதால் பொதுமக்கள் கடும் அவதிக்கு உள்ளாகினர்.  தொடர் விடுமுறையை யொட்டி சொந்த ஊர் சென்ற பொதுமக்கள் மீண்டும் திரும்பும் வகையில் மதுரையிலிருந்து சென்னைக்கு 90 அரசு பேருந்துகள் இயக்கப்பட்டது.

இந்நிலையில், அங்கிருந்து சென்னைக்கு செல்லும் ஆம்னி பேருந்துக்களில் இரு மடங்கு கூடுதலாக கண்டனம் வசூலிக்கப்பட்டதால்  மக்கள் கடும் வேதனை அடைந்தனர்.

இதையும் படிக்க   |  "2026-ஆம் ஆண்டு தேர்தலிலும் பாஜக கூட்டணி இல்லை" - எடப்பாடி பழனிச்சாமி

பால் கொள்முதல் விலையை உயர்த்த வேண்டும் என்ற விவசாயிகளின் கோரிக்கைகள் முதலமைச்சரின் கவனத்திற்கு  கொண்டு செல்லப்பட்டுள்ளதாக பால்வளத் துறை அமைச்சர் மனோ தங்கராஜ் கூறியுள்ளார். 

கன்னியாகுமரி மாவட்டம் நாகர்கோவில் அடுத்த புத்தேரி அரசு பள்ளியில் பல்வேறு கல்லூரிகளை சேர்ந்த மாணவர்கள் இணைந்து கட்டிக் கொடுத்துள்ள கழிவறைகளை இன்று அமைச்சர் மனோ தங்கராஜ் திறந்து வைத்தார் .

அதன் பின் செய்தியாளர்களை சந்தித்த அமைச்சர் கூறும் போது, படிக்கும் வயதில் மாணவர்கள் இதுபோன்ற சமூக சிந்தனைகளுடன் ஈடுபடுவது மிகவும் பாராட்டுக்குரியது என தெரிவித்தார்.

மேலும் செய்தியாளர்களின் கேள்விக்கு பதில் அளித்த அமைச்சர் கூறுகையில்,..

“தமிழ்நாட்டில் 11,000 பால் கூட்டுறவு சங்கங்கள் இருக்கின்றன. இவற்றில் 4 மண்டலங்களாக பிரித்து தற்போது பயிற்சி அளிக்கப்பட்டு வருகிறது. கூட்டுறவு சங்கங்களின் செயல்பாடுகளை எவ்வாறு புனரமைப்பது, விவசாயிகளை எவ்வாறு அணுகுவது என்பது உள்பட மூன்று கட்ட பயிற்சி நடக்க இருக்கிறது. ஏற்கனவே பயிற்சி முகாம் தொடங்கி நடந்து வருகிறது. விரைவில் கூடுதலாக பத்தாயிரம் பேருக்கு பயிற்சி அளிக்கும் திட்டத்தை நான் தொடங்கி வைக்க இருக்கிறேன். 

ஆவினைப் பொருத்தவரை சிறந்த கட்டமைப்பு கொண்டதாக செயல்பட்டு வருகிறது. விவசாயிகள் பால் கொள்முதல் விலையை உயர்த்தி தரவேண்டும் என்று கோரிக்கை வைத்திருக்கிறார்கள். அதில் தவறில்லை விவசாயிகளின் கோரிக்கையை முதலமைச்சரின் கவனத்திற்கு கொண்டு சென்றிருக்கிறோம். விரைவில் நல்ல தீர்வு கிடைக்கும்.

விடுதலைக்கு முன் நாட்டு மக்களை அடிமைப்படுத்தி, பிளவுபடுத்தி வைத்திருந்த கூட்டத்தைச் சேர்ந்த தமிழ்நாடு கவர்னர் நாட்டின் விடுதலை தொடர்பாக இப்போது பேசி வருகிறார். அவருக்கு மனித விடுதலை குறித்து பேச எந்த உரிமையும் கிடையாது” .

இவ்வாறு அவர் கூறினார்.

இதையும் படிக்க   |  “பாஜக தவிர அனைத்து கட்சிகளும் நீட் தேர்வை எதிர்கின்றன” - துரை வைகோ

ஆயுத பூஜையை முன்னிட்டு கோயம்பேடு மார்க்கெட்டில் 10 நாட்களுக்கு சிறப்பு சந்தை அமைக்கப்பட்டு  அக்டோபர் 27-ந்தேதி வரை செயல்படும் என தெரிவிக்கப்பட்டுள்ளது.

சென்னை கோயம்பேடு மார்க்கெட்டில் ஆண்டுதோறும் விநாயகர் சதுர்த்தி, ஆயுத பூஜை, பொங்கல்  உள்ளிட்ட விழா காலங்களில் சிறப்புசந்தை திறக்கப்படுவது வழக்கமாக உள்ளது. பொதுமக்கள் பண்டிகையை கொண்டாடுவதற்கான பொருட்கள் மற்றும் பூஜை பொருட்களை ஒரே இடத்தில் வாங்குவதற்காக இந்த சிறப்பு சந்தை நடைபெறும். 

இந்த சந்தையில் பொதுமக்களுக்கு பொருட்கள் குறைந்த விலையில் விற்பனை செய்யப்படும். கோயம்பேடு மலர் அங்காடி வளாகத்தில் இந்த சிறப்பு திறக்கப்படுவது வழக்கம். இந்த சந்தையானது, கோயம்பேடு மார்க்கெட் நிர்வாகம் மூலம் ஏலம் விடப்பட்டு, ஒப்பந்ததாரர் மூலம் நடத்தப்படும். தற்போது கோயம்பேடு
மார்க்கெட் வளாகத்தில் மெட்ரோ ரெயில் நிர்வாகம் மூலம் சாலை அமைக்கும் பணிகள் நடந்து வருகிறது. இதனால் இந்த முறை சிறப்பு சந்தை நடத்துவதற்காக ஏலம் விடப்படவில்லை. கோயம்பேடு மார்க்கெட் நிர்வாகமே நேரடியாக சிறப்பு சந்தையை நடத்துகிறது.

அதன்படி கோயம்பேடு மார்க்கெட்டில் உள்ள மலர் அங்காடி வளாகத்தில் ஆயுத பூஜையையொட்டி சிறப்பு சந்தை நேற்று தொடங்கியது. இதில் முதல் நாளான நேற்று பலவகையான கடைகள் அமைக்கப்பட்டு இருந்தன.  இந்த சிறப்பு சந்தையில் நவராத்திரி கொண்டாடுவதற்கு தேவையான பொருட்கள் விற்பனை
செய்யப்படுகின்றன.

இந்த சந்தையில் பொறி, கடலை, வாழைப்பழம். வாழைக்கன்று, வாழை இலை, தேங்காய், கரும்பு போன்ற பொருட்கள் விற்பனை செய்யப்படுகின்றன. மேலும் ஆப்பிள், சாத்துக்குடி, மாதுளை உள்ளிட்ட பூஜையில் வைப்பதற்கு தேவையான அனைத்து  பழங்களும் விற்கப்படுகிறது. சாமி படங்களுக்கு அணிவிப்பதற்கான சாமந்தி உள்ளிட்ட அனைத்து வகையான பூக்களும் விற்பனை செய்யப்படுகின்றன.

சிறப்பு சந்தை திறக்கப்பட்டதையொட்டி பொதுமக்கள் இங்கு வந்து வீடுகளுக்கு தேவையான பூஜை பொருட்களை குறைந்த விலையில் வாங்கி சென்றனர். பொருட்கள் இங்கு மொத்த விலையிலும் சில்லறை விற்பனை விலைக்கும் விற்பனை  செய்யப்படுகிறது. சிறப்பு சந்தை வருகிற 27- ந்தேதி வரை 10 நாட்களுக்கு செயல்படும் எனவும் தெரிவிக்கப்பட்டுள்ளது. 

இதையும் படிக்க: பங்காரு அடிகளார் மறைவு; அண்ணாமலை பாதயாத்திரை ரத்து!