சட்ட விரோதமாக தத்துக் கொடுக்கப்பட்ட குழந்தைகள்: போலியாக பிறப்பு சான்றிதழ் தயாரித்தது யார்?
மதுரையில் சட்ட விரோதமாக தத்துக் கொடுக்கப்பட்ட 3 குழந்தைகள் மீட்கப்பட்ட நிலையில், போலியாக பிறப்பு சான்றிதழ் தயாரித்தது யார் என்பது குறித்து போலீசார் விசாரணை நடத்தி வருகின்றனர்.
webteam
மதுரை சுந்தர்ராஜபுரம் பகுதியை சேர்ந்த சித்ரா. மனநலம் பாதிக்கப்பட்ட இவர் சாலையோரம் வசித்து வந்துள்ளார். இவருடைய முதல் கணவர் உயிரிழந்த நிலையில், இரண்டாவது கணவர் முருகனுடன் 6 குழந்தைகள் பிறந்துள்ளன. இவர்களுக்கு பிறந்த முதல் குழந்தை இறந்த நிலையில், இரண்டு மற்றும் மூன்றாவதாக பிறந்த குழந்தைகள் காணாமல் போயுள்ளன. நான்காவதாக பிறந்த இரட்டை குழந்தையை சித்ராவின் உறவினர் சுகன்யா - கணேஷ்குமார் தம்பதி வளர்த்து வருகின்றனர். ஐந்தாவதாக பிறந்த குழந்தையை செல்லூர் பகுதியை சேர்ந்த செல்வி என்பவருக்கு சுகன்யா தத்து கொடுத்துள்ளார்.
மேலும் ஆறாவதாக பிறந்த பெண் குழந்தையை பிறந்த மூன்றே நாட்களில் பாலசந்தர் - கலாநிதி தம்பதிக்கு தத்து கொடுத்துள்ளனர். இந்த குழந்தைக்கு சரவணன் என்ற இடைத்தரகர் 20 ஆயிரம் ரூபாய் பணம் பெற்றுக் கொண்டு போலியாக பிறப்பு சான்றிதழ் தயாரித்து கொடுத்தது தெரியவந்துள்ளது.
இந்த விவகாரம் அனைத்தும் வெளிவந்த நிலையில் குழந்தைகள் நல அதிகாரிகள் 3 குழந்தைகளை மீட்டு காப்பகத்தில் ஒப்படைத்துள்ளனர். மேலும் குழந்தைகளின் தாயார், தத்து கொடுத்தவர் மற்றும் குழந்தைகளை வளர்த்து வந்த அனைவரையும் அழைத்து போலீசார் விசாரணை மேற்கொண்டு வருகின்றனர். இந்த சம்பவம் அந்த பகுதியில் அதிர்ச்சியை ஏற்படுத்தியுள்ளது.
